Kastrioti firmos me sulmuesin lushnjar, zyrtarizohet edhe një mbrojtës
Brunild Pepa është zyrtarisht lojtar i Kastriotit. Sulmuesi lushnjar, ashtu siç ka paralajmëruar “Panorama Sport”, ka firmosur ditën e djeshme dhe menjëherë i është bashkuar pjesës tjetër të skuadrës në stërvitjen e pasdites.
Pepa është një sulmues me eksperiencë në kampionatin shqiptar, pasi ka luajtur me mjaft skuadra në Superiore dhe jo vetëm, duke filluar nga Lushnja, Teuta, Flamurtari dhe Vllaznia.
Në pjesën e parë të sezonit 2018-2019 sulmuesi ishte te Gjilani në Superligën e Kosovës. Me afrimin e lushnjarit, klubi krutan shton konkurrencën në repartin ofensiv, teksa krahas Jurgen Vatnikajt dhe Taulant Markut, tashmë do të ketë një forcë më tepër.
ARMAND RAMI – Gazeta mëson se dje është zyrtarizuar edhe mbrojtësi i majtë, Armand Rami, i cili ka firmosur për Kastriotin pas disa javësh stërvitjeje me ekipin krutan.
Rami në pjesën e parë të kampionatit ishte te Kamza. Që prej dhjetorit ai është stërvitur me skuadrën krutane dhe dje ka nënshkruar një kontratë 1-vjeçare.
STËRVITJA – Sakaq, nën drejtimin e trajnerit Bledar Devolli, Kastrioti ka vijuar edhe të dielën përgatitjet për ndeshjen e parë zyrtare për vitin 2019, që është ajo e Kupës ndaj Partizanit. Krutanët nuk kanë objektiva në këtë kompeticion, pasi e gjithë vëmendja është e fokusuar te përballja ndaj Luftëtarit në kampionat, e cila do të zhvillohet të dielën.
Interesant është fakti se Devolli do të debutojë si trajner i Kastriotit në kampionat pikërisht kundër skuadrës së vendlindjes. Kjo është hera e parë që gjirokastriti shkon në qytetin e tij si një trajner kundërshtar. Këtë sezon Devolli e nisi te Kamza, ku u largua pas tri javësh, ndërsa më pas drejtoi Tomorin e Beratit.
NDIQE LIVE "PANORAMA TV"