Europiani i Shtangës/ Qerimaj nuk klasifikohet në dygarësh, po ka shpresa për medalje në shkëputje (VIDEO)
Në Tiranë vijojnë garat e Kampionatit Europian të Peshëngritjes, të cilat po mbahen në sallën “Feti Borova”.
Pas dy medaljeve të arta dhe një të argjendtë nga Evangjelia Veli, sot në pedanë u ngjit Erkand Qerimaj, një tjetër pretendent i kombëtares kuqezi.
Shkodrani konkurroi në baterinë B të peshave 73 kg. Ndonëse në baterinë e dytë, Qerimaj provoi të “rrihte” shumë lart, me objektivin e vetëm për tu futur në zonën e medaljeve.
Në stilin e shkëputjes, pasi dështoi dy provat e para me 150 kg, shkodrani ja doli në të tretën ta kalonte me sukses, duke e mbyllur në vend të parë baterinë B në shkëputje.
Më pas ishte radha e stilit të shtytjes. Qerimaj nuk ja doli në dy provat e para me 174 kg, ndërsa u tërhoq në të tretën, e për rrjedhojë nuk u klasifikua në dygarësh.
Gjithsesi me rezultatin 150 kg në shkëputje Qerimaj i mban gjallë shpresat për medalje.
Kujtojmë që bateria A do ti nisë garat në orën 20:00, aty ku sytë e të gjithë shqiptarëve do të jenë të fokusuar te Briken Calja, që është pretendent për kampion Europe.
ARTIN LLESHAJ – PANORAMASPORT.AL
NDIQE LIVE "PANORAMA TV"