Vetëm pak orë e ndajnë Ivan Gvozdenoviçin nga firma me Skënderbeun. Ish-mbrojtësi do të rikthehet me shumë mundësi në Korçë, por këtë herë më një tjetër status: atë të trajnerit.

Kjo gjë pritet që të marrë formë zyrtare sapo të ndodhë një tjetër takim mes serbit dhe Ardjan Takajt, që me shumë mundësi do të ndodhë ditën e sotme.

Burime të sigurta për “Panorama Sport” bënë me dije për gazetën se 44-vjeçari ka marrë dje në mesditë fluturimin për në Tiranë dhe direkt është nisur në juglindje të Shqipërisë.

Ai do të ulet sërish me presidentin, për të mbyllur një herë e mirë këtë histori.

Nuk është se kanë mbetur shumë gjëra për të diskutuar që pas takimit të parë, të zhvilluar të shtunën e 19 dhjetorit.

Një pjesë të mirë të gjërave i kanë fiksuar dhe tashmë mund të thuhet që e ka një akord mes palëve.

E megjithatë, kanë mbetur edhe disa detaje të vogla të kontratës për të rakorduar.

Detaje që anojnë më së shumti në anën financiare.

Me të gjetur gjuhën e përbashkët në këtë drejtim, Ivan Gvozdenoviç do të nënshkruajë dhe prezantohet para ekipit si trajner i ri.

Nëse gjithçka mbyllet si duhet, ai do të jetë i dyti i huaj që drejton Skënderbeun, pas Stanislav Levit.

LLAZI SARO – PANORAMASPORT.AL

NDIQE LIVE "PANORAMA TV"

---