Besëlidhja nuk ka ndërmend të ndalet në kampionatin kombëtar të basketbollit për meshkuj, teksa po zhvillon një sezon rekordesh. Pas pjesëmarrjes në Ligën Unike, si skuadra shqiptare që u paraqit më denjësisht në eventin mbarëkombëtar, lezhjanët u janë rikthyer fitoreve në kampionat.

Skuadra e Afrim Bilalit regjistroi triumfin e 18-të në po kaq ndeshje të zhvilluara, teksa mposhtu dje në transfertë Elbasanin me rezultatin treshifror 74-148, takim i vlefshëm për javën e 20-të. Besëlidhja tregoi një nivel të jashtëzakonshëm, sidomos në fazën sulmuese, përballë një rivali që e kishte të pamundur t’i përgjigjej të njëjtit ritëm loje. Miqtë u treguan të papërmbajtshëm në katërta periodat, duke realizuar mbi 33 pikë në secilën prej tyre. Kështu skuadra veriore e nisi furishëm, për ta konkretizuar me avantazhin 13-35 në çerekun e parë.

Edhe perioda e dytë vijoi e ngjashme, me Besëlidhjen që triumfoi 17-33, duke shkuar në pushimin e madh me avantazhin e përgjithshëm 30-68. Ritmi ishte edhe më i shfrenuar me rikthimin në parket në periodën e tretë, teksa miqtë fituan 25-45, duke thelluar në 55-113 pas 30 minutash. Ndonëse me shumë ndryshime në formacion, efikasiteti në sulm i lezhjanëve mbetet i lartë edhe në periodën e katërt, fraksion që mbyllet 19-35, ndërsa e gjithë ndeshje shkon me plot 74 pikë epërsi për të besuarit e Bilalit.

Kështu lezhjanët vijojnë të komandojnë me pikë të plota dhe pa asnjë humbje në kampionat, ndërsa e kanë siguruar vendin e parë në sezonin e rregullt si dhe fazën “play off”. Plot nëntë lojtarë të Besëlidhjes shkuan në dopioshifër pikësh në transfertën elbasanase, ndërsa vlerësimin MVP e meritoi amerikani Blake Marquardt, autor i 25 pikëve dhe 8 kërcimeve në rreth 18 minutat që qëndroi në parket. Për Elbasanin efikasitetin më të lartë e kishte Samuel Skëndaj me 26 pikë e 10 kërcime.

FLAMURTARI-SKËNDERBEU Në ndeshjen tjetër të luajtur dje, Flamurtari fitoi në shtëpi kundër Skënderbeut në shifrat 98-79 (32-27, 20-16, 20-19, 26-17). Vlonjatët bënë më mirë në të katërta periodat, duke merituar edhe suksesin, ndërsa lojtari i ndeshjes ishte amerikani Maki Mohr, protagonist me 33 pikë, 14 kërcime dhe 6 asitime për vendësit. Në kampin korçar spikati Leon Thanas me 32 pikë, por Skënderbeu vijon të regjistrojë vetëm humbje në kampionat, duke u pozicionuar në vendin e fundit të tabelës.

Java e 20-të do të kompletohet sot me ndeshjet Vllaznia-Fieri në Shkodër, Kamza-Teuta në Bathore dhe Partizani-Apolonia në “Asllan Rusi”. Me gjashtëshen e parë thuajse të kristalizuar, të përbërë nga Besëlidhja (e kualifikuar në gjysmëfinale), Teuta, Tirana, Kamza, Vllaznia dhe Apolonia, tashmë mbetet për t’u përcaktuar vendi i dytë, i cili të çon direkt në gjysmëfinalet e “play off”-it.

PANORAMASPORT.AL

NDIQE LIVE "PANORAMA TV"

---