Partizani po hyn në një fazë shumë të rëndësishme të verës, teksa klubi po përgatitet për nisjen e punës në funksion të sezonit të ri.Pas javësh pritjeje dhe lëvizjesh në prapaskenë, tashmë po afrohet momenti kur skuadra do të rikthehet në fushë për të nisur përgatitjet zyrtare. Sipas planit të hartuar nga drejtuesit e klubit, të kuqtë do të rikthehen në grumbullim në fillim të muajit korrik. Objektivi është që deri më 5 korrik të gjithë futbollistët të jenë të pranishëm dhe të vendosen nën urdhrat e trajnerit të ri, i cili pritet të nisë menjëherë punën me grupin.

TRAJNERI- Gjithçka të çon te Florin Bratu. Trajneri rumun është shumë pranë marrjes së drejtimit të Partizanit dhe pritet që zyrtarizimi i tij të vijë brenda një kohe të shkurtër. Palët kanë arritur marrëveshjen në aspektin financiar dhe tashmë mbeten vetëm detaje procedurale përpara se bashkëpunimi të bëhet publik. Presidenti Gazment Demi ka qenë një nga mbështetësit kryesorë të kësaj zgjedhjeje dhe ka ndjekur nga afër negociatat që kanë çuar drejt marrëveshjes me teknikun rumun. Me emërimin e trajnerit të ri, Partizani do të mund të nisë zyrtarisht edhe fazën operative të sezonit të ardhshëm. Stafi teknik do të ketë mundësinë të njohë grupin, të vlerësojë gjendjen fizike të lojtarëve dhe të fillojë punën për ndërtimin e skuadrës.

GRUMBULLIMI DHE ZHVENDOSJA NË MAQEDONINË E VERIUT Në ditët e para të grumbullimit, ekipi do të zhvillojë përgatitjet në kryeqytet. Kompleksi i Federatës Shqiptare të Futbollit do të jetë baza e punës së skuadrës për rreth dhjetë ditë. Gjatë kësaj periudhe pritet të kryhen testet fizike, kontrollet mjekësore dhe vlerësimet e para të stafit teknik mbi futbollistët që do të jenë pjesë e projektit për sezonin e ri. Kjo fazë konsiderohet shumë e rëndësishme, pasi do të shërbejë për krijimin e bazës fizike mbi të cilën do të ndërtohet pjesa tjetër e përgatitjeve. Pas qëndrimit në Tiranë, Partizani do të zhvendoset në Maqedoninë e Veriut. Ashtu si në disa raste edhe në vitet e kaluara, drejtuesit kanë zgjedhur Ohrin si destinacion për fazën intensive përgatitore. Skuadra pritet të qëndrojë atje për rreth dy javë, periudhë gjatë së cilës do të zhvillohen seanca intensive stërvitore dhe një numër ndeshjesh miqësore. Qëndrimi në Ohër do t’i japë mundësi stafit teknik të punojë në kushte optimale dhe larg ngarkesës së përditshme që shoqëron sezonin. Njëkohësisht, kjo periudhë do të shërbejë edhe për integrimin e futbollistëve të rinj që mund t’i bashkohen skuadrës gjatë merkatos së verës. Në klub po punohet edhe për programin e ndeshjeve miqësore. Drejtuesit janë në kërkim të kundërshtarëve të përshtatshëm që mund të ofrojnë teste cilësore për ekipin. Qëllimi është që Partizani të përballet me skuadra që mund të ndihmojnë trajnerin të krijojë një ide më të qartë për nivelin e grupit dhe për elementët që kanë nevojë për më shumë punë. Ndeshjet miqësore do të kenë rëndësi të veçantë edhe për futbollistët, të cilët do të kërkojnë të bindin trajnerin e ri dhe të fitojnë një vend në formacionin bazë.

MERKATO NË HYRJE– Ndërkohë, merkatoja mbetet një tjetër çështje e rëndësishme. Emërimi i Bratut pritet të zhbllokojë edhe lëvizjet në hyrje, pasi tekniku do të japë miratimin e tij për futbollistët që do të afrohen. Partizani synon të ndërtojë një skuadër konkurruese dhe të rikthehet mes ekipeve që luftojnë për objektivat më të rëndësishëm të kampionatit. Për këtë arsye, faza përgatitore e verës shihet si një moment vendimtar për të hedhur themelet e sezonit të ri. Pas një kampionati zhgënjyes, ku të kuqtë mbetën jashtë Europës, në klub ekziston dëshira për të reaguar dhe për të rikthyer ekipin në nivelet që kërkon historia e Partizanit. Me trajnerin e ri pranë zyrtarizimit, me grumbullimin që po afron dhe me fazën përgatitore të planifikuar deri në detaje, te Partizani po fillon gradualisht numërimi mbrapsht drejt sezonit të ri. Tashmë mbetet vetëm që skuadra të zbresë në fushë dhe të nisë punën, me shpresën se ky do të jetë fillimi i një kapitulli më të suksesshëm për klubin kryeqytetas.

PANORAMASPORT.AL

---