Drejtësia të çojë para përgjegjësisë dy brinjët e mbetura të Trekëndëshit të Bermudës dhe t’u hetojë pasuritë të gjithë politikanëve dhe zyrtarëve të korruptuar.
Ky ishte mesazhi i një prej qytetarëve nga podiumi i protestës në ditën e 55-të të saj para Kryeministrisë.
Ai tha se protesta po tregon se sheshi është i qytetarëve.
“Kjo protestë ka treguar se sheshi i përket popullit. Qytetarët nuk pranojnë të jenë spekatorë, kërkojnë drejtësi dhe llogaridhënie. I bëj thirrje Edi Ramës dhe Sali Berishës, është koha të largoheni e të përballeni me drejtësinë. Tregoni origjinën e pasurisë tuaj dhe lejoni drejtësinë të hetojë. Duhet të marrë fund pandëshkueshmëria dhe korrupsioni. Unë vij çdo ditë në protestë dhe do jem derisa qytetarët të mos dorëzohen. Askush nuk e ndalon një popull të kërkojë demokraci, të drejtën”, tha ai mes të tjerash.
Ai bëri thirrje për politikën e vjetër që të largohej dhe që t’i vinte fundi pandëshkueshmërisë. Ai i drejtoi edhe një thirrje Prokurorisë së Posaçme.
“Një thirrje për ata deputetë, a kanë turp apo s’kanë? A e dëgjojnë thirrjen e popullit? Rama në burg, Berisha në burg, largim i klasës së vjetër politike. I bëj thirrje SPAK-ut të arrestojë edhe dy brinjët e tjera të trekëndëshit të Bermudës, sepse një nga brinjët iku”, vijoi ai.
Në fund bëri thirrje për një Shqipëri të re dhe klasë të re politike:
“Të vendosë para përgjegjësisë çdo zyrtar të korruptuar. Shqipëria ka nevojë për drejtësi dhe një klasë të re politike, koha e pandëshkueshmërisë ka mbaruar”.
© Panorama.al
