Kreu i Grupit Parlamentar të PD-së, Gazment Bardhi ka reaguar për ndryshimet në Kodin e Procedurës Penale të propozuara nga PS, duke thënë se kryeministri Edi Rama nuk po mbron Belinda Ballukun, por veten e tij, duke i vendosur një mburojë tjetër kryeministrit nga SPAK.
Me ironi, ai shkruan se për heë të parë e beson kryeministrin se me këtë ndryshim nuk kanë lidhje me zëvendës kryeministren e pezulluar dhe e marrë e pandehur nga SPAK, por kanë të bëjnë për veten e tij.
Sipas kreut të grupit parlamentar demokrat, Rama po propozon që kryeministri të pezullohet nga detyra nëse drejtësia do të shkojë tek zyra e tij, duke përmendur çështjen McGonigal si dhe inceneratorët.
“Prandaj, e besoj Edi Ramën, sepse ai po përpiqet të vendosë një imunitet të ri politik për veten nga SPAK-u. E besoj, sepse qëllimi i tij është personal. Ai do që funksioni i Kryeministrit të mos ndahet nga emri i Edi Ramës, pavarësisht provave të drejtësisë kundër tij. (Dhe çështja McGonigal është ende në hetim. Çështja e qendrimit të qeverisë për incineratorët është ende në hetim).”, shkruan Bardhi.
Ai shton se ndërhyrjet në legjislacion nuk do ta shpëtojnë kreun e qeverisë dhe se nuk mund t’i hedhë hi syve shqiptarëve, BE dhe SHBA-së.
“E besoj Edi Ramën, kur thotë se fillimisht do të votohet për imunitetin e Belinda Ballukut dhe më pas do të ndryshohet Kodi. E besoj, sepse ai sërish po mendon për veten. Po mendon se procedura do ta shpëtojë nga vijat e kuqe. Por vijat e kuqe nuk zhduken me procedurë. As me hi syve shqiptarëve, BE-së dhe SHBA-së.”, shton ai.
Reagimi i plotë:
Për herë të parë “e besoj” Edi Ramën!
E besoj kur thotë se ndryshimet në Kodin e Procedurës Penale nuk kanë lidhje me Belinda Ballukun. Sepse ai sot ndryshon ligjin për t’i vendosur Kryeministrit një mburojë plus nga SPAK-u. Edi Rama po propozon që Kryeministri të mos pezullohet nga detyra, nëse drejtësia gjykon se ai, për shembull, po prish provat e një hetimi.
E besoj Edi Ramën, kur thotë se ka refuzuar tre herë dorëheqjen e Belinda Ballukut. Sepse qëllimi i tij nuk ka qenë kurrë të mbrojë Belindën, por veten e tij. Refuzimi i dorëheqjes nuk është më çështje luajaliteti. Është çështje precedenti. Ndryshimi i Kodit të Procedurës Penale në mes të një hetimi penal aktiv për Zëvendëskryeministren nuk bëhet vetëm për sot.
Bëhet për ditën kur drejtësia mund të trokasë më lart se numri dy i qeverisë. Prandaj, e besoj Edi Ramën, sepse ai po përpiqet të vendosë një imunitet të ri politik për veten nga SPAK-u. E besoj, sepse qëllimi i tij është personal. Ai do që funksioni i Kryeministrit të mos ndahet nga emri i Edi Ramës, pavarësisht provave të drejtësisë kundër tij. (Dhe çështja McGonigal është ende në hetim. Çështja e qendrimit të qeverisë për incineratorët është ende në hetim).
E besoj Edi Ramën, kur thotë se fillimisht do të votohet për imunitetin e Belinda Ballukut dhe më pas do të ndryshohet Kodi. E besoj, sepse ai sërish po mendon për veten. Po mendon se procedura do ta shpëtojë nga vijat e kuqe. Por vijat e kuqe nuk zhduken me procedurë. As me hi syve shqiptarëve, BE-së dhe SHBA-së.
Çfarë parashikojnë ndryshimet në Kodin e Procedurës Penale?
Grupi Parlamentar i PS prezantoi sot ndryshimin në nenin 242 i Kodit të Procedurës Penale, që aktualisht nuk lejon pezullimin nga detyra vetëm të deputetit, kryebashkiakut dhe anëtarë të Këshillit Bashkiak. Me ndryshimet, në të do të shtohen edhe Presidenti, Kryeministri, zv.kryeministri, ministrat, Avokati i Popullit, Kreu i KLSH-së dhe anëtarët e Gjykatës Kushtetuese.
