Edhe ish-presidenti dhe ish-kryeministri i Malit të Zi, Milo Gjukanoviç përmendet në dosjet që lidhen me pedofilin e dënuar, Jeffrey Epstein, të publikuara nga Departamenti i Drejtësisë i SHBA-së. Gjukanoviç përmendet në mesazhet që Epstein ka shkëmbyer me politikanin sllovak Miroslav Lajcak, ish i dërguari i BE për dialogun Kosovë-Serbi, i cili aktualisht mbante postin e këshilltarit të kryeministrit sllovak Robert Fico, por dha dorëheqjen.
Në një nga mesazhet, Lajçak shkroi se Presidenti i Malit të Zi “mezi pret vizitën tonë”.
Epstein i përgjigjet Lajçak, “Ndoshta duhet t’i japë Donaldit një strehë të sigurt.”
Lajçak përgjigjet se “pika e dobët e Donaldit është Mali i Zi”.
Epstein më pas i shkruan Lajçak se ish-avokati i Presidentit të Shteteve të Bashkuara Donald Trump, Michael Cohen, dhe ish-këshilltari Paul Manafort, janë “të dy fajtorë” dhe shkroi “fillimin e fundit”.
Gjatë bisedës, Epstein i dërgon Lajçakut edhe një link nga portali New York Times me një artikull rreth Malit të Zi dhe një fotografi të Kotorrit, të cilit Lajçak i përgjigjet: “Të thashë që Mali i Zi ishte i shkëlqyer”.
Epstein e pyet gjithashtu Lajcak nëse Gjukanoviçi ishte president apo kryeministër i Malit të Zi, dhe Lajcak u përgjigj se ai ishte presidenti.
Disa nga mesazhet u shkëmbyen në gusht 2018, dhe disa më 21 shtator të të njëjtit vit.
Ish-presidenti malazez, Milo Gjukanoviç reagoi pas publikimit të këtyre mesazheve duke thënë se nuk e njihte Epstein dhe se nuk kishte pasur kurrë komunikim të drejtpërdrejtë ose të tërthortë me Epsteinin.
“Në përgjigje të interesit të shpeshtë të përfaqësuesve të medias në lidhje me publikimin e komunikimeve të të ndjerit Jeffrey Epstein, dua t’ju informoj se nuk e njihja Epstein, as nuk kam pasur ndonjëherë komunikim të drejtpërdrejtë ose të tërthortë me të. Prandaj, kuptohet, nuk mund të dëshmoj për besueshmërinë e bisedave të publikuara të Epstein, as për vizitat e tij të mundshme në Mal të Zi. “, shkroi mes të tjerash ai në rrjete sociale.
Dokumentet e publikuara nga Departamenti Amerikan i Drejtësisë nuk përmbajnë asnjë informacion nëse Gjukanoviç është takuar realisht me Epsteinin, as nëse ish-presidenti i Malit të Zi ka marrë pjesë në ndonjë aktivitet të paligjshëm.
© Panorama.al
