Ish-kryetari Bashkisë Tiranë Erion Veliaj, ka reaguar nga qelia për ndarjen nga jeta të ish-kryeministrit dhe kryetarit të Partisë Socialiste, Fatos Nano.
Në një reagim në rrjetet sociale, Veliaj shprehet se Nano ishte kryetari që formësoi Partinë Socialiste dhe politikën moderne shqiptare.
“Me vizionin e tij qytetar dhe thellësisht europian, ai besoi se e majta duhet të ishte hapje, debat dhe progres, jo thjesht dogmë. Sot kujtojmë me respekt një udhëheqës tolerant e liberal, i cili diti t’i tregojë këto cilësi edhe me mua, vite më parë, në ditët e rebelimit aktivist”, ka shkruar Veliaj.
Ndër të tjera, socialisti ka shprehur mirënjohjen për frymën që Nano i dha ndër vite të majtës shqiptare.
Reagimi i Veliajt:
Me trishtim mora lajmin e ndarjes nga jeta të Fatos Nanos, kryetari që formësoi Partinë Socialiste dhe politikën moderne shqiptare.
Me vizionin e tij qytetar dhe thellësisht europian, ai besoi se e majta duhet të ishte hapje, debat dhe progres, jo thjesht dogmë.
Sot kujtojmë me respekt një udhëheqës tolerant e liberal, i cili diti t’i tregojë këto cilësi edhe me mua, vite më parë, në ditët e rebelimit aktivist.
Demokracia nuk matet me sa shumë flasim, por si debatojmë me qytetari dhe sa shumë dimë të dëgjojmë njëri-tjetrin. Sepse liria nuk është vetëm e drejta për të folur, por edhe përgjegjësia për të kuptuar.
Kjo ishte fryma që Fatos Nano i dha të majtës shqiptare dhe për çka duhet t’i jemi mirënjohës.
U prehtë në paqe.
© Panorama.al
