Toni Kros flet hapur në një intervistë të gjatë me Romarion, duke rishikuar karrierën e tij te Real Madridi. Ai gjithashtu ndalet edhe te Çabi Alonso e ish-trajneri i tij, Karlo Ançeloti.
“Nuk jam më futbollist, por jeta është ende e bukur. Një kapitull që zgjati pothuajse tridhjetë vjet ka mbaruar dhe jam i lumtur. Tani punoj me fëmijë dhe jam i lumtur me këtë”.
Kur u pyet se cili klub ishte më i madhi i karrierës së tij, Kros është padyshim i qartë: “Përgjigja është shumë e thjeshtë, Real Madridi.”
Dhjetë vjet me fanellën e bardhë, të cilat ai i quan më të rëndësishmet dhe më të suksesshmet e karrierës së tij futbollistike. “Ishte periudha më e suksesshme, u ndjeva si në shtëpi. Real Madridi ishte si një familje, ishin vitet më të mira.”
Duke folur për ngjarjet aktuale në Madrid, Kros nxit durim me Çabi Alonson. “Të stërvitësh Realin, thekson ai, është sfida më e vështirë e mundshme. Këtu, fiton dhe askush nuk është i lumtur, barazim ose humbje dhe kritikohesh menjëherë. Çabi ka cilësi dhe e njeh mjedisin, por duhet kohë, edhe nëse është pothuajse e pamundur ta kesh në Madrid.”
Së fundmi, fjalë lavdërimi për Ançelotin dhe një reflektim mbi Nejmarin: “Nëse është mirë fizikisht, mund të bëjë diferencën kudo, por problemi është të kuptojmë se kur do të jetë vërtet në 100% formë”.
PANORAMASPORT.AL
© Panorama.al
