Kryeministri Sali Berisha reagoi nga Brukseli në lidhje me pretendimin e opozitës se po manipulohen zgjedhjet nëpërmjet listave të zgjedhësve. Kreu i qeverisë kujtoi se listat janë përgjegjësi e pushtetit lokal, në një kohë kur bashkitë e mëdha të vendit qeverisën nga opozita. “Në të gjitha qytetet e mëdha qeveris opozita. Me sa shoh unë opozita po ankohet drejt vetes së vet. Unë nuk mund t’ia nxjerr atij kurrë dyshimin. Njëherë akuzoi 20 000 komisionerë, tani akuzon qeveritarët e tij vendorë. Këto janë probleme të brendshme të opozitës. Ajo çka unë mund t’u garantoj është përkushtimi i plotë dhe total, një proces zgjedhor të lirë dhe të ndershëm”, deklaroi Berisha. Kreu i qeverisë shtoi se në takimet që kishte pasur me homologët e partive popullore evropiane, u kishte kërkuar vëmendje dhe vëzhgues për zgjedhjet lokale në Shqipëri. “Kërkesa ime në këtë rast ishte që qeveritë, sepse ODIHR-i përbëhet nga vëzhgues që dërgojnë qeveritë, ministritë e jashtme, pra kërkesa ime ndaj tyre ishte që të udhëzojnë ministritë e jashtme respektive për t’i dërguar ODIHR-it vëzhguesit, sepse numri i përgjithshëm ka rëndësinë e vet. Kjo ishte kërkesa e parë. Natyrisht, unë kam marrëdhënie të shkëlqyera, dhe ky ishte një rast për të falënderuar me shumë mirënjohje të gjithë Presidencën e EPP-së, miqtë e mi që mbështetën vendosmërisht Shqipërinë dhe e mbështesin atë”, deklaroi kryeministri Berisha.
© Kjo faqe kontrollohet dhe menaxhohet nga Gazeta Panorama. Të gjitha materialet në të, përfshirë fotografitë, janë të mbrojtura me copyright të Panorames. Materialet në këtë faqe nuk mund të përdoren për qëllime komerciale. Ndalohet kopjimi, riprodhimi dhe publikimi i paautorizuar në çfarëdo mënyre, pa lejen paraprake të Panorama-s. Shfrytëzimi i materialeve pa lejen e Grupit Panorama është shkelje e te drejtave të autorit dhe të pronës intelektuale sipas dispozitave ligjore në fuqi. Të gjithë shkelësit e këtyre të drejtave do të ballafaqohen me ligjin. Të gjitha të drejtat Gazeta Panorama