Qytetarët e shumtë në protestën para Parlamentit nuk u dorëzuan për asnjë moment, duke pritur me durim në ‘pritën’ e tyre para godinës me pakot e vezëve në rrugë.
Në momentin që ligjvënësit lanë institucionin pas seancës plenare dhe dolën me makinat e tyre, protestuesit lëshuan breshëri vezësh ndaj tyre në largim e sipër.
Forca të shumta policia i kanë gjurmuar nga pas me vrap dhe me shkopinj gome qytetarët, të cilët u përpoqën të shpëtonin nga dhuna.
Disa prej tyre janë shoqëruar nga uniformat blu, duke u marrë me forcë zvarrë dhe dërguar në komisariat me makina, siç shihet edhe në pamjet. Të paktën dy prej tyre janë parë të kapur për krahësh nga efektivët.
Policia u përpoq të mbronte deputetët nga sulmi me vezë dhe domate i qytetarëve të revoltuar, që kërkojnë prej 54 ditësh largimin e qeverisë, dorëheqjen e Ramës dhe ndryshimin e sistemit të vjetër politik.
