Aeroplanmbajtësja amerikane “Gerald R. Ford”, e cila është e vendosur në Karaibe, u vizitua sot nga Sekretari i Mbrojtjes i SHBA-së Pete Hegseth.
Në një postim të Pentagonit në Platformën X, i cili shoqërohet me një video, Hegseth shihet duke përshëndetur oficerët dhe anëtarët e ekuipazhit. Sekretari i Mbrojtjes i SHBA-së përcolli gjithashtu urimet e Presidentit të SHBA-së Donald Trump për “Ditën e Falënderimeve”.
SHBA-të kanë vendosur një forcë të fortë ushtarake në rajon – duke përfshirë aeroplanmbajtësen më të madhe dhe më të përparuar në botë (USS Gerald R. Ford), anije luftarake dhe avionë luftarakë – në operacione që synojnë luftimin e karteleve të trafikimit të drogës, të cilat kanë përshkallëzuar tensionet midis Uashingtonit dhe Karakasit zyrtar (Venezuelës).
Që nga fillimi i shtatorit, forcat amerikane kanë nisur sulme ajrore në Karaibe dhe Paqësor kundër anijeve që dyshohet se trafikojnë drogë. Më shumë se 20 anije janë shkatërruar deri më sot, me të paktën 83 të vdekur.
Uashingtoni akuzon presidentin venezuelian Nicolas Maduro dhe qeverinë e tij, për drejtimin e karteleve të trafikimit të drogës të destinuara për tregun amerikan dhe në fillim të këtij viti, dyfishoi shpërblimin që ofron për informacionin që çon në arrestimin e Maduros në 50 milionë dollarë.
#AHORA 🔴 El secretario de Guerra de #EEUU, Pete Hegseth, visita este #27Nov el portaaviones USS Gerald R. Ford, buque insignia del operativo naval que se mantiene desplegado en el Caribe.
La inspección del alto funcionario se da en medio del aumento de tensiones con el régimen… pic.twitter.com/HWMEVIl4mV
— VPItv (@VPITV) November 27, 2025
Karakasi mohon akuzat e Uashingtonit dhe e akuzon atë për përdorimin e goditjes ndaj trafikut të drogës si pretekst “për të imponuar ndryshimin e regjimit” në Venezuelë dhe për të sekuestruar rezervat e mëdha të naftës në vend.
Presidenti i SHBA-së, Donald Trump, po dërgon mesazhe kontradiktore në lidhje me mundësinë e sulmeve në tokën venezueliane.
Ai ka miratuar operacione sekrete të CIA-s në Venezuelë, nuk përjashton mundësinë e ndërhyrjes ushtarake, por siguron se synon të flasë drejtpërdrejt me homologun e tij venezuelian, Nicolas Maduro.
© Panorama.al
