TRANË- Partia Socialiste ka dërguar sot në Kuvend draftin për TVSH-në, ndryshe projektligjin “Për disa shtesa dhe ndryshime në ligjin Nr. 7928, Datë 27.04.1995 “Për tatimin mbi vlerën e shtuar”, i ndryshuar”
Në relacionin që shoqëron këtë projektligj thuhet se “barra fiskale për çdo familje shqiptare gjatë 5 viteve të fundit është rritur me 18 %. Gjatë kësaj periudhe megjithëse të ardhurat disponibël për konsum ishin rritur me 44 %, vetëm disa nga zërat bazë për të përballuar jetesën e përditshme janë rritur si më poshtë; energjia elektrike është rritur 62 %, barnat jane rritur 43 %, shërbimi shëndetësor është rritur 50 %, mielli, buka, sheqeri, vaji, orizi janë rritur mesatarisht me 52 %.”
Sipas Partisë Socialiste qëllimi kryesot i propozimit të këtij ligji është për të lehtësuar përballimin e jetesës së shqiptarëve, nëpërmjet lehtësimit të barrës fiskale dhe ndikimit direkt te çmimi i këtyre produkteve, duke shtuar se “ulja e cmimeve do të kontribuonte në rritjen e kërkeses, për këto produkte.”
PS kërkon që në ligj të bëhen këto ndryshime;
Pas nenit 24/1 te ligjit, të shtohen nenet 24/2 dhe 24/3 me këtë përmbajtje:
“Neni 24/2
“Furnizimi për grurin, miellin, bukën, qumështin, vezën, janë furnizime që tatohen me 0% TVSH dhe furnizimi për vajin, sheqerin dhe orizin janë furnizime të tatueshme në masën ç%, duke filluar nga dt. 1 janar 2012”.
Neni 24/3
Duke filluar nga dt. 1 janar 2012, furnizimi i barnave dhe shërbimeve shëndetsore nga institucionet shëndetsore, publike dhe private, është furnizim i përjashtuar.”
Neni 2
Pika 2 e nenit 30 të hiqet.
Neni 3
Ngarkohet Ministria e Financave të nxjerrë udhëzimet në zbatim të këtij ligji.
Neni 4
Ky ligj hyn në fuqi 15 dite pas botimit në Fletoren Zyrtare dhe i shtrin efektet nga 1 Janari 2012.
© Panorama.al
