Presidenti rus Vladimir Putin tha të premten se sulmet në Ukrainë po dëmtojnë ekonominë e vendit të tij, por se ajo po “rimëkëmbet shpejt” prej tyre.
“Ata (Ukraina) sigurisht që po na shkaktojnë disa dëme, por ne po rikuperohemi shpejt. Ata nuk do të jenë në gjendje të na shkaktojnë probleme serioze”, tha Putin gjatë një takimi me personelin ushtarak që merrte pjesë në luftën Rusi-Ukrainë.
Duke shprehur se prania e ushtrisë ruse në zonën e “operacionit të posaçëm ushtarak”, të cilin Moska e përdor për t’iu referuar luftës në Ukrainë, tejkalon 700,000 personel, Putin tha se vendi i tij është “praktikisht i vetëm në kundërshtimin” e Perëndimit.
Putin tha se forcat e vendit të tij nuk po përparojnë në Ukrainë “aq shpejt sa do të donim”, por se ato ende po ecin përpara gradualisht ditë pas dite.
“Pak nga pak, po i vëmë territoret tona nën kontrollin tonë. Do ta arrijmë këtë; askush nuk mund ta vërë në dyshim”, tha më tej Putin.
Ai tha se Rusia do të rrisë gradualisht forcën e sulmeve të saj hakmarrëse kundër Ukrainës për t’i “dekurajuar ata që të sulmojnë objektet tona civile”.
Ndërsa përsëriti akuzat e Rusisë kundër NATO-s për fillimin e luftës në Ukrainë, Putin vlerësoi nivelin e zhvillimit teknologjik dhe shkencor të vendeve të NATO-s, duke i përcaktuar ato si “ekonomi shumë të zhvilluara”.
© Panorama.al
