Të gjitha historitë e emigracionit në ‘Amsterdam Express’

Mbrëmë, në kinema “Millenium” u shfaq filmi “Amsterdam Expres” me skenar dhe regji të Fatmir Koçit. Një film i zhanrit dramë-aksion, ku me sa duket Koçi ndihet më mirë. I sigurt në lojën e aktorit Blerim Destani, që është edhe bashkëproducent, i cili ka edhe një eksperiencë jete, por edhe filmografie jashtë vendit, regjisori ia ka besuar atij kryerolin e filmit. Atë të emigrantit shqiptar, që emigron në Amsterdam, Holandë për të bërë ca para të shpejta. Ngjarjet zhvillohen mes Amsterdamit dhe Tiranës, në dy linja paralele. Duket që pas tij ka një investim i madh. Siç ndodh rëndom në filmat shqiptarë, heroit i ndodhin të gjitha të zezat. Se si ngatërrohen gjërat dhe të gjitha çuditë i ndodhin një shqiptari: Ikën për të bërë para për të ngritur një shtëpi, përballet me një botë të rrezikshme prostitucioni e droge, por lekët që dërgon ia vjedh shoku i ngushtë; ngatërrohet me një trafikant droge e prostitutash dhe do të shpëtojë nga dritaret e seksit një vajzë me emrin Ana; por ndërkohë në Shqipëri, në rrethinat e Tiranës, aty ku ai banon ka lënë të dashurën, Martën, që ka një baba të dhunshëm… Filmi është i ngjeshur me ngjarje, që duket sikur s’do mbarojnë kurrë, sepse heroit gjithçka mund t’i ndodhë. Është kjo një mani e regjisorëve shqiptarë, për të thënë sa më shumë gjëra në një film.
Elementi femër është i fortë në film. Është Marta, vajza e lënë në Shqipëri, Ana, vajza-prostitutë që Bekimi tenton të shpëtojë dhe Suzana vajza simpatike holandeze, që pranon të martohet me shqiptarin, sigurisht jo thjesht për humanizëm, por sepse e pëlqen atë. Dhe e gjithë ngjarja ndodh mes këtij trekëndëshi femëror dhe zhurmës së vazhdueshme të trenave, prej të cilëve duket se Koçi i ka vënë titullin filmit.
Duke synuar një treg më të gjerë se ai shqiptar dhe kjo është më se legjitime, Koçi synon të zgjedhë një kast aktorësh shumëkombësh, mundësisht ku fliten shumë gjuhë. Madje edhe shqiptarët tek-tuk e kanë shqipen me theks të huaj. Kjo histori emigracioni, ose më saktë kjo shumësi historish emigracioni, erdhi nën interpretimin e aktorëve: Blerim Destani, James Biberi, Flonja Kodheli, Carolien Spoor, Natasha Goulden, Gert Ferra. Në role episodike edhe Rajmonda Bulku, Bujar Lako, si prindërit e Bekimit, Vasjan Lami në rolin e babait të Martës, Olta Gixhari, në rolin e një shoqeje lesbike të Martës.
Mbrëmë filmi u shfaq për herë të parë për një publik të ftuar, që ishte më i shumtë në numër se karriget e sallës së kinema “Millenium”, ndërsa në ditët në vijim do të shfaqet për publikun e gjerë.   

Filmi
Gjinia:             Dramë, Aksion

Aktorë:         Blerim Destani, James Biberi,                 Flonja Kodheli, Carolien Spoor,                 Natasha Goulden, Gert Ferra

Drejtor filmi:         Fatmir Koçi

Skenari:         Fatmir Koçi

Producentë:         Rozeta Feri, Blerim Destani

© Panorama.al