Presidenti i SHBA-së, Donald Trump, duket i vendosur të ndërmarrë një raund të ri tarifash doganore ndaj dhjetëra vendeve, madje brenda kësaj jave, pavarësisht rekomandimeve të bashkëpunëtorëve të tij më të afërt për të shmangur masa që mund të shkaktojnë luhatje të reja në ekonominë amerikane, në prag të zgjedhjeve të ndërmjetme.
Sipas Financial Times, zyrtarët amerikanë kanë përgatitur tashmë skenarë alternativë, pasi të premten përfundon vlefshmëria e regjimit të përkohshëm të tarifës së përgjithshme prej 10% që zbatohet për importet. Administrata amerikane po shqyrton vendosjen e tarifave të reja ndaj rreth 60 vendeve.
Nisma e re vjen vetëm pak ditë pasi u njoftua vendosja e një tarife prej 50% për produktet që importohen nga Kanadaja, ndërsa më herët ishte vendosur një tarifë prej 25% për importet nga Brazili. Këto masa konfirmojnë se presidenti amerikan vazhdon t’i përdorë tarifat doganore si një nga instrumentet kryesore të politikës së tij tregtare.
Tarifat e reja vijnë pasi, më herët gjatë këtij viti, Gjykata e Lartë e SHBA-së rrëzoi tarifat reciproke që ishin vendosur pas njoftimit të Trump për të ashtuquajturën “Dita e Çlirimit”, në prill të vitit 2025.
Pas vendimit të gjykatës, hyri në fuqi një regjim i përkohshëm me tarifë 10%, i cili skadon këtë javë. Tarifat e reja pritet të mbështeten në një hetim lidhur me praktikat e punës së detyruar, duke i dhënë administratës mundësinë të veprojë pa u mbështetur në kompetencat e jashtëzakonshme presidenciale, të cilat u hodhën poshtë nga Gjykata e Lartë.
Sipas vlerësimeve, tarifat e para do të variojnë nga 10% deri në 12,5%, ndërsa janë në zhvillim edhe hetime të tjera tregtare që mund të krijojnë bazën ligjore për vendosjen e tarifave edhe më të larta në të ardhmen.
Brenda administratës amerikane, zyrtarë të lartë thuhet se i kanë rekomanduar presidentit të ruajë stabilitetin e marrëdhënieve tregtare me partnerët kryesorë dhe të respektojë marrëveshjet e arritura gjatë vitit 2025 për uljen e tarifave.
Në të njëjtën kohë, përpjekja e Trump për të rindezur luftën tregtare përkon me rritjen e tensioneve mes Shteteve të Bashkuara dhe Iranit, të cilat kanë ndikuar në tregjet ndërkombëtare të energjisë dhe kanë sjellë rritje të çmimeve të karburanteve në SHBA, duke rënduar edhe më tej koston e jetesës.
Gjatë javëve të fundit, administrata amerikane ka zbutur një pjesë të planeve fillestare për tarifa të larta, duke përjashtuar disa mallra bazë të konsumit, si mishi i viçit dhe kafeja. Gjithashtu, janë lehtësuar edhe disa nga tarifat për produktet që përmbajnë çelik dhe alumin.
© Panorama.al
