Një sulm me raketa balistike ruse vrau 10 persona dhe plagosi rreth 100 të tjerë në një zonë të Kievit, ku po mbahej një aktivitet në një vend stërvitjeje të industrisë së mbrojtjes, thanë zyrtarët ukrainas dhe përfaqësuesit e industrisë.
Presidenti Volodymyr Zelensky, i cili nuk e përmendi objektivin e saktë, tha se përpjekjet po vazhdojnë për të përcaktuar saktësisht se çfarë ndodhi atje.
“Një operacion shpëtimi është duke u zhvilluar aktualisht në rajonin e Kievit pas një sulmi me raketa ruse”, tha Zelensky në një postim në aplikacionin Telegram.
Zëvendësguvernatori i rajonit të Kievit, Ruslan Oleinik, tha se sipas informacioneve paraprake, një sulm me raketa balistike goditi një poligon privat stërvitjeje ku po mbahej eventi.
Këshilli i Industrisë së Mbrojtjes së Ukrainës raportoi se sulmi me raketa goditi një strukturë ku ndodheshin përfaqësues të industrisë së mbrojtjes ukrainase.
Ai tha se nuk ishte organizatori i eventit. Ai shtoi se informacioni në lidhje me vendndodhjen e saktë të pjesëmarrësve nuk u bë publik.
Valery Borovik, themeluesi i kompanisë ukrainase të dronëve “First Contact”, u tha mediave ukrainase se një raketë goditi një poligon stërvitjeje ku po mbahej një ekspozitë e industrisë së mbrojtjes.
Prokurori i Përgjithshëm i Ukrainës, Ruslan Kravchenko, tha se është hapur një çështje penale për shkelje të mundshme të detyrave zyrtare në organizimin dhe mbajtjen e këtij eventi.
© Panorama.al
