Kryetari i PS-së, Edi Rama, duke prezantuar kandidatët e koalicionit “Aleanca për të ardhmen”, mes të cilëve dhe ish-banorja e “Big Brother”, Republika Kasmahu, e cila kandidon për kreun e komunës Lazarat, u bëri apel qytetarëve të Gjirokastrës që në zgjedhjet lokale të majit të votojnë koalicionin e majtë. Sipas tij, Sali Berisha, në takimet elektorale në Gjirokastër, duhet të japë llogari për papunësinë. “Apeli im për të gjithë qytetarët e rrethit të Gjirokastrës është të votojnë pa asnjë ngurrim kandidatët tanë, që janë shprehje e një aleance me qytetarët. Ne nuk ju themi jeni të parët një herë në katër vjet, por i ofrojmë njerëzillëkun çdo ditë. Kur të vijë këtu Saliu do t’ju premtojë turizëm, alpinizëm çiklizëm, rroga, pensione, hardhi, arra, shegë, sepse nuk i ka mbetur asgjë më përveç grahmave të fundit me gënjeshtrat më të mëdha që i ka mendja, por ndërkohë ka shqiptarë që vuajnë drejt papunësinë dhe Kryeministri duhet të përgjigjet pse një milion shqiptarë janë të papunë, ndërkohë që thotë se ka mrekulli ekonomike”, nënvizoi Rama.
