Në 35-vjetorin e Partisë Socialiste, ish-deputetja dhe ish-ministrja Ermelinda Meksi ka reaguar pas qëndrimit të Petro Koçit, një ditë më parë që e quajti Belinda Ballukun “themeluese të korrupsionit”.
Meksi thekson se shkrimi i Petro Koçi, ngre çështje që meritojnë vëmendje dhe reflektim, jo si debat mes individësh, por si shqetësim për mënyrën se si ka evoluar Partia Socialiste krahasuar me frymën e viteve të para të saj.
“Një parti që qëndron gjatë në pushtet përballet natyrshëm me sfidën e ruajtjes së dinamizmit, pluralizmit te mendimit dhe aftësisë për vetëkorrigjim.
Kjo është çështja më e rëndësishme që ngre ky shkrim, veçanërisht në një moment kur besimi publik dhe aftësia për të dëgjuar zërat kritikë po bëhen gjithnjë e më të rëndësishme për të ardhmen e PS”, shkruan Meksi.
Nga Ermelinda Meksi
Në 35-vjetorin e Partisë Socialiste, shkrimi i Petro Koçit ngre disa çështje që meritojnë reflektim.
Më shumë se debat mes individësh, e lexoj atë si një shqetësim për mënyrën se si ka evoluar Partia Socialiste në raport me frymën e viteve të para të saj.
PS e fillimviteve ’90 u përpoq të fitonte besimin e shoqërisë përmes debatit të ideve, përfshirjes së intelektualëve, demokracisë së brendshme dhe hapjes ndaj mendimit ndryshe. Shumë prej nesh u angazhuam në PS pikërisht për këto vlera.
Për këtë arsye ky shkrim më preku, aq më shumë që me qarkun e Fierit më lidh një nga betejat më të rëndësishme elektorale të jetës sime politike. Në vitin 2009, pas pesë mandatesh si deputete e Tiranës,Partia Socialiste më besoi, së bashku me mallakastriotin Piro Lutaj, një nga sfidat më të vështira elektorale në qarkun e Fierit. Kandidova plot dëshire në Mallakastër, vendlindjen e tim eti, një zonë ku gjithë pushtetii lokal qe i dominuar nga Partia Demokratike. Falë punës së socialistëve dhe mbështetjes së mallakastriotëve kudo që jetonin, arritëm fitoren qe ndryshooi ekuilibrat politikë të zonës.
Kur dëgjoj sot diskutime mbi përqendrimin e vendimmarrjes, dobësimin e debatit të brendshëm apo largimin e figurave me kontribute, mendoj se përgjigjja nuk duhet të jetë mohimi i problemit, por reflektimi mbi të.
Një parti që qëndron gjatë në pushtet përballet natyrshëm me sfidën e ruajtjes së dinamizmit, pluralizmit te mendimit dhe aftësisë për vetëkorrigjim.
Kjo është çështja më e rëndësishme që ngre ky shkrim, veçanërisht në një moment kur besimi publik dhe aftësia për të dëgjuar zërat kritikë po bëhen gjithnjë e më të rëndësishme për të ardhmen e PS.
Në këtë përvjetor, u shpreh mirënjohjen të gjithë socialistët që ndërtuan dhe mbështetën Partinë Socialiste në vitet më të vështira te opozites si dhe në ato të qeverisjes.
Gëzuar 35-vjetorin, me urimin që PS të ruajë gjithmonë aftësinë për të dëgjuar, reflektuar dhe rinovuar veten.
© Panorama.al
