Kancelari gjerman, Friedrich Merz, deklaroi se sirianët nuk kanë më arsye për të përfituar azil në Gjermani, pas përfundimit të luftës civile në vendin e tyre. Ai shtoi se ata do të inkurajohen të kthehen për të ndihmuar në rindërtimin e atdheut.
“Lufta civile në Siri ka përfunduar. Nuk ka më arsye për të dhënë azil në Gjermani, që do të thotë se mund të fillojmë procesin e rikthimit të tyre në atdhe,” tha Merz gjatë vizitës së tij të hënën në qytetin Huzum në veri të Gjermanisë. Ai gjithashtu përmendi mundësinë e deportimeve për ata që refuzojnë të kthehen.
Deklaratat e tij duket se bien në kundërshtim me ato të ministrit të Jashtëm, Johan Vanteful, i cili pas vizitës së tij në Damask javën e kaluar shprehu dyshime se shumë sirianë do të zgjedhin të kthehen, duke marrë parasysh shkatërrimin dhe paqëndrueshmërinë e vazhdueshme, që sipas tij e bëjnë të vështirë jetesën dinjitoze. Fjalët e kreut të diplomacisë gjermane shkaktuan reagime të forta brenda vetë partisë së tij, CDU.
Kancelari Merz premtoi gjithashtu se Berlini do të kontribuojë në rindërtimin e Sirisë, duke theksuar se shumë sirianë që ndodhen aktualisht në Gjermani do të kthehen për të marrë pjesë në këtë proces.
“Pa këta njerëz, rindërtimi është i pamundur,” tha Merz. “Dhe ata që refuzojnë të kthehen, natyrisht mund të deportohen në të ardhmen e afërt,” shtoi ai.
Sipas të dhënave zyrtare, rreth 951.400 sirianë ndodheshin në Gjermani në fund të gushtit, prej të cilëve 920 kishin urdhër deportimi në pritje.
© Panorama.al
