Iker Kasijas, legjenda e Kombëtares spanjolle dhe kampion bote, bëri postime pikante pas kualifikimit epik të Kombëtares së Argjentinës në finalen e Kupës së Botës 2026 pas fitores 2-1 ndaj Anglisë në Atlanta, por në të njëjtën kohë, pavarësisht fjalëve lavdëruese për “Albiçelestët”, ai paralajmëroi se Kupa do t’i takojë “La Rojës”.
Së pari, ish-portieri i Real Madridit hodhi kritika ndaj Tomas Tuhelit për qasjen angleze pas golit të Entoni Gordonit. “Ai shënon golin dhe skuadra u vendos prapa. Qasje e një frikacaku. Ata nuk u larguan nga zona dhe lejuan Argjentinën të arrinte më shumë. Gjëja logjike ndodh, kundërshtari të preson dhe goli është çështje kohe”.
Sapo mbaroi ndeshja, ish-futbollisti u shpreh se kombëtarja angleze e ka humbur vetë ndeshjen me interpretimin që i bëri takimit. Më pas kaloi te ndeshja finale, ajo e Spanjës kundër Argjentinës. “Do të jetë e mahnitshme”, tha kampioni i botës në Afrikën e Jugut 2010. Më pas, me cicërima të mprehta, ai e bëri të qartë se i beson Spanjës për finalen e madhe. “Ju – tha ai, duke iu drejtuar argjentinasve – nuk do të qëndisni yllin e katërt”. Më pas shtoi: “Nuk do të ketë një yll të katërt. Le të shkojmë për të dytën! Le të shkojmë me Spanjën!”.
Kasijas, i cili vuajti për vite me radhë Lionel Mesin në duelet mes Barcelonës dhe Real Madridit, ishte i bindur se fitorja do të shkonte në krahun e “La Rojës”.
Argjentina ishte duke humbur 1-0 me një gol të Entoni Gordonit, por e ktheu rezultatin në fund me dy gola të mëdhenj. Bomba e Enzo Fernandezit dhe më pas – pas një krosimi nga Lionel Mesi me këmbën e djathtë – një goditje me kokë nga Lautaro Martinez e çuan në finale. Kjo do të jetë përballja e shtatë për titullin për ekipin kombëtar, i cili po kërkon yllin e tij të katërt me ndihmën e “Pleshtit” dhe Lionel Skalonit.
PANORAMASPORT.AL
© Panorama.al
