Autoritetet ushtarake gjermane paralajmërojnë se sulmet kibernetike, aktet e sabotazhit dhe fushatat e dezinformimit mund të shërbejnë si fazë përgatitore për një konflikt të ri ushtarak në Europë. Ky vlerësim përfshihet në një plan operacional konfidencial, i cili e trajton luftën hibride si pjesë të një përshkallëzimi më të gjerë ushtarak, raporton Politico, që ka siguruar dokumentin.
Bëhet fjalë për Planin Operacional për Gjermaninë (OPLAN), një dokument kuadër që përcakton mënyrën se si Berlini do të organizojë mbrojtjen e territorit gjerman në rast të një konflikti të madh të NATO-s. Plani pasqyron ndryshimin e qasjes së Gjermanisë, e cila ka marrë një rol qendror në logjistikë dhe në përforcimin e forcave aleate, në një kohë kur Rusia shihet gjithnjë e më agresive ndaj vendeve të NATO-s pas pushtimit të plotë të Ukrainës.
Sipas dokumentit, masat hibride “mund të funksionojnë në thelb si përgatitje për një përballje ushtarake”, duke i vendosur sulmet kibernetike dhe operacionet e ndikimit drejtpërdrejt në logjikën e përshkallëzimit ushtarak dhe jo thjesht si presion dytësor.
OPLAN e përshkruan Gjermaninë si një bazë operative dhe korridor kalimi për trupat e NATO-s, rol që e bën vendin një objektiv të hershëm presioni dhe sulmesh, për shkak të rëndësisë së saj në lëvizjen dhe mbështetjen e forcave aleate. Dokumenti paralajmëron se, në rast konflikti, Gjermania do të ishte ndër “objektivat e para të sulmeve konvencionale me rreze të gjatë”, që do të synonin si infrastrukturën ushtarake ashtu edhe atë civile.
Plani 24-faqësh parashikon një model përshkallëzimi me pesë faza, nga zbulimi i hershëm i kërcënimeve dhe parandalimi, deri te mbrojtja kombëtare, mbrojtja kolektive e NATO-s dhe rimëkëmbja pas konfliktit. Sipas vlerësimit gjerman, vendi ndodhet tashmë në fazën e parë, e fokusuar në koordinimin qeveritar, identifikimin e kërcënimeve dhe përgatitjen e masave logjistike dhe mbrojtëse.
Dokumenti i jep një rol të zgjeruar edhe forcave të brendshme, të cilat do të merren me mbrojtjen e infrastrukturave kritike, sigurimin e lëvizjes së trupave brenda vendit dhe mbështetjen e funksionimit të shtetit, ndërsa forcat luftarake do të dislokohen jashtë.
Autoritetet theksojnë gjithashtu rëndësinë e strukturave civile për suksesin ushtarak, duke përmendur rrjetet e transportit, furnizimin me energji, shërbimet shëndetësore dhe kontraktorët privatë si elementë kyç. “Shumë misione kërkojnë mbështetje civile”, thekson dokumenti.
Së fundmi, Gjermania dhe aleatët e saj kanë përjetuar një sërë sulmesh hibride që përkojnë me skenarët e përshkruar në OPLAN. Autoritetet federale raportojnë rritje të spiunazhit rus, sulmeve kibernetike dhe përpjekjeve për ndikim ndaj institucioneve politike, infrastrukturave kritike dhe opinionit publik, me ministrin e Brendshëm Alexander Dobrindt që e ka cilësuar Gjermaninë si “një objektiv të përditshëm të luftës hibride”.
© Panorama.al
