Vllaznia dhe Tirana fituan bindshëm dy takimet e tyre ndaj Dinamos dhe Laçit, duke bërë një hap përpara në renditje.Madje shkodranët duket se kanë vulosur pjesëmarrjen në Europë. Bardheblutë shkatërruan Laçin 4-0 falë një loje ndër më të bukurat dhe rezultativet, që nga momenti që në krye të skuadrës ka ardhur trajneri Misho Kërstiçeviç. Tirana u tregua menjëherë agresive duke bërë të qartë objektivin e saj, tri pikët. Në minutën e 23-të, Andi Lila depërtoi në zonë dhe dha një top për Gilman Likën. Ky i fundit nuk e pati të vështirë për të shënuar. Laçianët vuajnë në mbrojtje, ndërsa janë të paqartë në sulm. Kështu që Hyka dhe Gilman Lika rrezikojnë sërish. Në minutën e 29-të Hyka nuk gabon duke shënuar golin e dytë, pas një asisti të marrë nga Zizoviç. Edhe pjesa e dytë vazhdon me të njëjtat ritme, aq sa Karabeci fiton një penallti dhe Lila trefishon. Goli i katërt i shënuar po nga Hyka, thjesht tregoi ditën negative të kurbinasve, të cilët mund t’i thonë “lamtumirë” pretendimeve për Ligën e Europës.
Ndërkaq, në “Loro Boriçi” Vllaznia mori tri pikë të rëndësishme duke ruajtur vendin e tretë, pasi mundi Dinamon me rezultatin 3-1. Shkodranët treguan menjëherë dhëmbët, duke shënuar dy gola brenda 30 minutave të para. I përhershmi Sukaj tregoi dhe një herë se është lojtari i momentit në Superiore. U duk se Vllaznia do ta kishte të lehtë, por në pjesën e dytë Dinamo fitoi një penallti të shndërruar në gol nga Vila dhe rihapi takimin. Në këto kushte, Vllaznia hidhet në sulm për të gjetur golin e sigurisë dhe arrin ta gjejë atë në minutën e 88-të me anë të Shtubinës. Këtu morën fund edhe shpresat e dinamovitëve, por të dalë me pikë nga Shkodra, duke “dorëzuar armët”. Minutat në vazhdim u luajtën thjesht për statistikë dhe kronometër. Me këtë fitore Vllaznia ngjitet në kuotën e 47 pikëve, e qetë në vendin e tretë pas humbjes së Laçit, që tani është 4 pikë larg. Ndërsa Dinamo ka ngecur në vendin e 6-të me 37 pikë, jo shumë larg zonës së mbijetesës. Gjithsesi, blutë shpresojnë të shpëtojnë sezonin duke fituar Kupën e Shqipërisë, ku kanë arritur të sigurojnë një finale kundër Tiranës.
Superiore/ Java 27
Flamurtari-Kastrioti 1-0
E.Xhafa 66′ (autg)
Skënderbeu-Shkumbini 2-0
Soza 13′, Bratiç 75′
Elbasani-Besa 0-1
Shameti 82′
Bylis-Teuta 1-0
F.Xhafa 63′
Vllaznia-Dinamo 3-1
Sukaj 24′, 31′, Shtubina 88’/ Vila 57′ (p)
Tirana-Laçi 4-0
G.Lika 23′, Hyka 29′, 90′, Lila 29′ (p)
Renditja
Nr. Ekipi ND F B H P
1. Flamurtari 27 19 2 6 59
2. Skënderbeu 27 18 4 5 55
3. Vllaznia 27 13 8 6 47
4. Laçi 27 13 4 10 43
5. Tirana 27 10 11 6 41
6. Dinamo 27 10 7 10 37
7. Shkumbini 27 9 5 13 32
8. Bylis 27 9 3 15 30
9. Kastrioti 27 7 9 11 30
10. Teuta 27 7 8 12 29
11. Besa 27 7 8 12 29
12. Elbasani 27 4 3 20 12
Shënim: Elbasani, minus 3 pikë në renditje, i dënuar nga FIFA për shkak të çështjes “Darko Periç”.
LEONARD KARAJ
© Panorama.al
