Liridon Latifi është emri më i lakuar i kësaj merkatoje vere te Skënderbeu. Talenti kosovar kërkohet nga disa klube në Europë, në një kohë që korçarët synojnë të përfitojnë një shumë të konsiderueshme nga ai, ashtu siç ndodhi me Peter Olainkën dhe Bernard Berishën.
ROSTOV
Skënderbeu është zyrtarisht në negociata me klubin korçar për transferimin e Latifit. Palët ishin në prag të zyrtarizimit të marrëveshjes disa javë më parë, por gjithçka u prish në momentet e fundit. Drejtori teknik dhe trajneri u larguan nga klubi rus dhe marrëveshja mbeti pezull.
Skënderbeu mësohet se do të përfitonte rreth 1 milion euro nga ky operacion. Tashmë, duhet që Latifi t’i pëlqejë trajnerit të ri dhe më pas të vendoset nëse do të firmosë ose jo.
OSIJEK
Klubi kroat e kërkon me ngulm mesfushorin kosovar. Klubi ku së fundmi është transferuar edhe Eros Grezda, e pëlqen shumë Latifin. Por, do t’i duhet të bëjë një sforco jo të pakët financiare për të siguruar shërbimet e kosovarit.
Mësohet se Skënderbeu kërkon minimalisht 800 mijë euro që të lëshojë futbollistin. Për momentin, palët janë duke negociuar dhe do të shihet në ditët në vazhdim se çfarë do të vendoset për Latifin.
Sipas të gjitha gjasave, lojtari do të shitet jashtë në këtë merkato vere, në një kohë që Skënderbeu synon ta ketë minimalisht edhe në turin e dytë të Ligës së Europës, pasi në të parin ndaj amatorëve të Sant Julian nuk pritet të ketë surpriza. Latifi është lojtari që ka shkëlqyer te skuadra korçare gjatë kampionatit të fundit.
Besar Bozgo
NDIQE LIVE "PANORAMA TV" © Panorama.al
