Marshimi historik rrugëve të Tiranës u mbyll me një ‘uragan’, pjesëmarrje historike dhe varg kilometrik qytetarësh që hodhën thirrje e parulla kundër qeverisë dhe kërkuan dorëheqjen e kryeministrit Edi Rama në ditën e 14-të të revoltës, pas gati 6 orëve protestë.
Pas fjalimeve para kryeministrisë ka nisur marshimi tradicional nga bulevardi tek Bashkia, Kuvendi dhe më tej “Rruga e Elbasanit” dhe më tej “Ali Demi”, “Policia e Shtetit”, zona e “Brrylit”, “Rruga Bardhyl”.
Qytetarët mbërritën në sheshin Skënderbej rreth orës 23:30, duke i dhënë fund tubimit historik në ditën e 14-të, me pjesëmarrjen edhe të diasporës.
Protesta e kësaj të shtune ishtë më historikja e regjistruar që prej nisjes së lëvizjes në shesh për largimin e kryeministrit Edi Rama.
Ata ndoqën itinerarin e “Unazës”, deri te QSUT “Nënë Tereza”. “Deti” i protestuesvevijoi drejt “Medresesë” më pas, duke pushtuar edhe një tjerë rrugë me tubimin paqësor.
Nuk janë mjaftuar aty, por shkuan më tej drejt “Rrugës së Dibrës”, për të dalë drejt qendrës së Tiranës me thirrjet “Shqipëria e shqiptarëve”, “Shqipëri etnike”, dhe “Rama jepe dorëheqjen”.
Koka e marshimit mbërriti më pas në zonën e njohur si “Selvia”, duke u përhapur masivisht në ‘Rrugën e Dibrës’.
Nga aty kanë dalë te “9-Katëshet” për t’u rikthyer ku e nisën, në sheshin “Skënderbej”, duke festuar me flakadanë.
Qytetarë, të rinj dhe përfaqësues të diasporës kanë “pushtuar” plotësisht këtë aks të rëndësishëm rrugor, duke bllokuar totalisht qarkullimin e automjeteve dhe duke e kthyer zonën në një tjetër pikë të revoltës.
Thirrjet kryesore kanë qenë “Rama në burg, Berisha në burg”, “Revolucion”, “Shqipëri e re”, “Rama jepe dorëheqjen”, “Ju erdhi fundi”, “pa rini nuk ka Shqipëri”, “Pelikanin Kaçurrel, do ta sjellim në Kuvend”, “Bojkotoni këta plehra”, “Çohuni nga kafja”, dhe “Këtu vendosim ne”.
Një detaj ka qenë protesta para Parlamentit. Kur protestuesit ndaluan përpara institucionit ligjvënës, Kuvendi, u dëgjuan edhe brohoritje të fuqishme dhe njëzëri nga turma e revoltuar, e cila ka shpërthyer në koret:
“Parlamenti i krimit! Parlamenti i krimit!”.
Uragani i madh i qytetarëve ndoqi rrugën e “Unazës” nën flamuj, veshje kombëtare, parulla, pankarta dhe këngë patriotike.
Nuk munguan as thirrjet e ndryshme si “Poshtë patronazhistët”, por edhe ato patriotike “Shqipëri etnike”.
Për të 14-tën ditë më radhë mijëra qytetarët shfaqën sërish revoltën e tyre kundër qeverisë së Edi Ramës.
Edhe sot, ata u mblodhën fillimisht në sheshin “Skënderbej” në orën 18:30, për të vijuar më pas drejt kryeministrisë, aty ku për tre orë me radhë përsëritën thirrjet për dorëheqjen e Edi Ramës.
Qytetarët artikuluan një sërë problematikash sociale dhe ekonomike me të cilat përballen. Të pranishëm krah tyre, ishin edhe shumë emigrantë që jetojnë në vende të tjera.
Si zakonisht, pas tre orë fjalimesh para kryeministrisë, qytetarët vijuan marshimin nëpër rrugët e kryeqytetit, ashtu sikurse edhe e kanë bërë tashmë traditë.
Edhe në këtë ditë të revoltës së tyre nuk munguan mesazhet e forta përmes pankartave. “Kur diktatura është fakt, revolucioni është detyrë!”, “Kur populli flet, revolucioni troket”, “Pa ndryshim të politikës nuk ka të ardhme”, “Kur të hyjë në BE, a do të na ketë mbetur Shqipëria?”, ishin disa nga mesazhet e tyre.
Disa protestues zgjodhën të protestonin në një mënyrë të veçantë. Ata u shfaqën me zinxhirë në duar dhe me maska me fytyrën e Edi Ramës, të Belinda Ballukut dhe Sali Berishës, ndërsa mbanin pankarta me mbishkrimet:
“I pandehuri Edi Rama, tradhtar i kombit”, “I pandehuri, Belinda Balluku, tradhtare e kombit”, “I pandehuri Sali Berisha, tradhtar i kombit”.
© Panorama.al
