Ka dalë në internet një video e re e ushtarëve rusë, që dyshohet se po “ritrajnohen” për dezertim në luftën në Ukrainë.
Sipas një raporti nga ‘Daily Mail’, pamjet e kapura nga një komandant rus në vijën e frontit, e tregojnë atë duke zhveshur dhe lidhur ushtarë gjysmë të zhveshur në pemë në dëborë dhe në temperatura nën zero gradë si ndëshkim për braktisjen e pozicioneve të tyre në luftën me Ukrainën.
Rreth qafave të katër burrave varen tabela kartoni të improvizuara me përshkrime të tilla si “idiot”, “alkoolik” dhe “frikacak”, ndërsa në njërën prej tyre shkruan:
“U ankova për komandantin tim”.
Në video, oficeri dëgjohet duke akuzuar ushtarët për frikacakëri dhe refuzim për të luftuar për vendin e tyre, duke pretenduar se ata kanë vënë në rrezik jetën e rusëve të tjerë. Në një moment tjetër, ai shihet duke i goditur ata, duke thënë:
“Duhet të ndiqni urdhra të mallkuar”.
Burrat e lidhur, dukshëm të tronditur, sigurojnë se nuk do ta përsërisin aktin e tyre.
Kjo nuk është hera e parë që imazhe të tilla të oficerëve rusë bëhen publike. Në janar, u publikua një video që tregonte një ushtar rus të lidhur me kokë poshtë në një pemë, i veshur vetëm me të brendshme, në temperatura shumë të ulëta pranë frontit.
Në një incident tjetër, një ushtar i cili ishte gjithashtu i lidhur në një pemë thuhet se u detyrua të hante borë, me arsyetimin se u përpoq të braktiste postin e tij në vend që të ndiqte urdhrat.
