Momente tensioni janë shënuar sot në ditën e 29-të të protestës qytetare para Kryeministrisë, pasi efektivë të policisë kanë ndërhyrë për të larguar disa prej sendeve të vendosura nga protestuesit në shkallët e zyrës së Edi Ramës.
Siç shihet edhe nga pamjet, policia ka marrë stolat e vendosur nga qytetarët, ndërsa ka hequr edhe këpucët e vendosura në mënyrë simbolike në shkallët e Kryeministrisë, si pjesë e mesazheve të protestës, në kujtim të të afërmëve të tyre emigrantë.
“Mos i prekni këpucët, kjo është vjedhje e vullnetit popullor. Mos i ngacmoni veprat artistike të vëna nga populli”, është dëgjuar të thotë një prej qytetarëve, i cili është përplasur dhe me policët që kanë tentuar t’i heqin celularin ndërkohë që ai filmonte.
Ai ka kërkuar që policia të mos ndërhyjë ndaj protestuesve vajza, të cilat ndodhshin para kryeministrisë, pasi kanë qëndruar edhe gjatë natës, të cilat po kundërshtonin heqjen e këpucëve.
“Mos e prek vajzën, ku i keni policët femra? Mos e prekni. Ku është procesverbali i këpucëve? Mos e prek gocën, është në ambient publik. Është territor publik, mos e prek. Bashkia Tiranë që na lë pa drita po heq veprat e lëna nga qytetarët. S’po na lënë në territor publik. Hajdutëri. Kjo është dhunë policore, ky është provokim. Mos e prek gocën”, thotë ai.
© Panorama.al@mandijatagani♬ tingulli origjinal – Mandi Jatagani
