Një krim në familje është regjistruar në fshatin Kuman të Roskovecit, ku burri ka vrarë me armë zjarri tip pushkë gruan e tij dhe më pas ka qëlluar veten.
Ngjarja e rëndë ndodhi mesditën e kësaj të marte në banesën e tyre, ku 80-vjeçari Shefit Rrapaj qëlloi me armë zjarri bashkëshorten 75-vjeçare Dashuri Rrapaj dhe më pas i dha fund edhe jetës së tij.
Nuk dihen ende arsyet që e çuan 80-vjeçarin të ndërmarrë këtë akt ekstrem, ndërsa grupi hetimor vijon punën për zbardhjen e rastit.
Pas krimit, forca të shumta policie kanë shkuar në vendngjarje dhe jo vetëm.
Mësohet se çifti i të moshuarve në Kuman të Roskovecit jetonin bashkë me djalin e tyre, i cili në ato momente nuk ndodhej në banesë në çastin kur ndodhi konflikti mes prindërve.
Familjarë dhe banorë u gjendën në banesën e çiftit që mbeti viktimë e krimit vrasje-vetëvrasje. Ende jnuk ka informacione zyrtare për dinamikën dhe motivet e këtij krimi të rëndë mes të moshuarve dhe hetimet janë ende aktive.
Ndërsa forcat e policia ndodheshin në të gjithë territorin e banesës, miq e të afërm ngushëllonin familjarët për këtë humbje të dyfishtë.
