Të paktën 37 persona u vranë dhe dhjetëra të tjerë u plagosën në Peru, kur një autobus ra në një përrua të thellë, 200 metra pas një përplasjeje ballë për ballë.
Incidenti ndodhi në orët e para të mëngjesit të së mërkurës (12 nëntor), në një pjesë “të thyer” të Autostradës Pan-Amerikane, që lidh Perunë me Kilin, në rajonin jugor të vendit, Arequipa.
Mediat lokale thonë se autobusi po transportonte 60 pasagjerë, kur u përplas me një kamionçinë në një kthesë, doli nga rruga dhe ra në brigjet e lumit Ocoña.
Aksidentet me autobusë janë të zakonshme në Peru, veçanërisht natën dhe në autostradat malore. Kjo ndodh shpesh për shkak të kushteve të këqija të rrugëve, shpejtësisë së lartë dhe mungesës së sinjalistikës së sigurisë.
Autobusi, i drejtuar nga kompania Llamosas, po udhëtonte nga Chala, një qytet në provincën Caraveli, për në Arequipa.
Të dy shoferët thuhet se i mbijetuan aksidentit, i cili ndodhi në kilometrin e 780-të të Autostradës Pan-Amerikane Jugore. Pamjet nga vendi i aksidentit tregojnë autobusin e rrënuar në fund të një përroi të pjerrët – dritaret e tij të thyera plotësisht, karroceria e dëmtuar rëndë dhe çatia e shembur.
Waldor Llerena, kryebashkiaku i distriktit Ocona, i tha stacionit radiofonik RPP se terreni përreth vendit të rrëzimit është “shumë i thyer” dhe zona kishte një histori aksidentesh të ngjashme vdekjeprurëse.
Tridhjetë e gjashtë persona vdiqën në vendngjarje dhe një person tjetër vdiq më vonë në spital, tha Walther Oporto, shefi rajonal i shëndetësisë në Arequipa, për mediat lokale, duke cituar zjarrfikësit në vendin e përplasjes.
Zyrtarët e shëndetësisë i thanë RPP-së se 25 persona – përfshirë tre të mitur – po trajtohen në një spital lokal për lëndimet e tyre.
Në vitin 2022, më shumë se 3,300 njerëz vdiqën në aksidente trafiku në Peru, sugjerojnë shifrat zyrtare.
© Panorama.al
