“Asnjë termocentral” nuk është kursyer nga sulmet ruse, tha sot në Mynih, presidenti ukrainas Volodymyr Zelensky, ndërsa dërgesat nga aleatët për mbrojtjen ajrore ukrainase mbërrijnë, sipas presidentit ukrainas, ndonjëherë “në minutën e fundit”.
Kievi dhe aleatët e tij akuzojnë Moskën se po synon sistematikisht infrastrukturën ukrainase, duke i privuar qindra mijëra familje nga ngrohja dhe energjia elektrike gjatë dimrit. Ky dimër ka qenë veçanërisht i ashpër.
Në një fjalim që zgjati rreth 30 minuta me rastin e Konferencës së Sigurisë në Mynih, udhëheqësi ukrainas e quajti gjithashtu homologun e tij rus Vladimir Putin një “skllav të luftës”. Vladimir Putin “nuk mund të vendosë të eliminojë vetë idenë e luftës”, theksoi ai.
Gati katër vjet pas fillimit të pushtimit në shkallë të gjerë rus të Ukrainës, Zelensky shprehu keqardhje për ngadalësinë e vendimeve politike të nevojshme për t’iu kundërvënë sulmeve ruse.
“Ndonjëherë ne u dërgojmë raketa të reja sistemeve tona Patriot ose sistemeve tona NASAMS pak para një sulmi, dhe ndonjëherë në minutën e fundit”, tha ai.
Të premten, Presidenti i SHBA-së Donald Trump i bëri thirrje Zelensky-t të “lëvizë” për të arritur një marrëveshje me Rusinë, përpara një raundi të ri negociatash javën e ardhshme në Gjenevë midis Moskës, Kievit dhe Uashingtonit.
Presidenti ukrainas tha se shpreson që këto negociata të reja do të jenë “serioze dhe thelbësore”.
Megjithatë, siç theksoi ai, “amerikanët shpesh i rikthehen çështjes së lëshimeve dhe shumë shpesh këto lëshime diskutohen ekskluzivisht në kontekstin e Ukrainës dhe jo të Rusisë”.
Bisedimet e fundit midis rusëve, ukrainasve dhe amerikanëve në javët e fundit në Abu Dhabi janë përqendruar kryesisht në çështjen e një ndarjeje të mundshme të territorit midis Kievit dhe Moskës.
Udhëheqësi ukrainas shprehu keqardhje për mungesën e aleatëve evropianë në negociata. “Evropa në thelb nuk është e pranishme në tryezë. Ky është një gabim i madh, sipas mendimit tim”, tha ai.
“Çmenduri”
Zelensky akuzoi gjithashtu Putinin se donte të “përsëriste” episodin e konferencës së Mynihut në vitin 1938, kur fuqitë evropiane kishin pranuar shpërbërjen e Çekosllovakisë në një përpjekje për të qetësuar Adolf Hitlerin, përpara se të shpërthente Lufta e Dytë Botërore një vit më vonë.
«Do të ishte iluzion të besohej se kjo luftë tani mund të zgjidhet përgjithmonë me ndarjen e Ukrainës, ashtu siç ishte iluzion të besohej se sakrifikimi i Çekosllovakisë do ta shpëtonte Evropën nga një luftë e madhe», tha ai.
“Minimumi që ata duan është Donbasi, rajoni i Donetskut, 100% ta paraqesin atë si një fitore”, tha presidenti ukrainas në një konferencë për shtyp më vonë sot.
“Ne nuk mund të largohemi nga territori ynë, as të shkëmbejmë një copë tokë me një tjetër. Kjo është çmenduri. Nuk ka të bëjë vetëm me territoret: 200,000 njerëz jetojnë atje, mijëra kanë humbur jetën atje”, shtoi ai.
Gjatë fjalimit të tij, Zelensky përsëriti se Kievi po bën “gjithçka” për t’i dhënë fund konfliktit, duke theksuar se vetëm garancitë reale të sigurisë do të çojnë në një marrëveshje të qëndrueshme dhe do të pengojnë agresionin e ardhshëm rus.
Zelensky konfirmoi gjithashtu se Ukraina do të mbajë zgjedhje sapo të marrë garanci sigurie dhe të arrihet një armëpushim.
«Ne gjithashtu mund t’u japim rusëve një armëpushim nëse ata organizojnë zgjedhje në Rusi», tha ai me sarkazëm, duke u duartrokitur. Vladimir Putin e ka udhëhequr Rusinë që nga fundi i vitit 1999.
© Panorama.al
