Përurohet rruga pedonale “Murat Toptan”

Përurohet rruga pedonale “Murat Toptani” në kryeqytet. Kryetari i Bashkisë së Tiranës, Lulzim Basha dhe ambasadori i Bashkimit Europian, Etore Sekui, prenë dje pasdite shiritin e përurimit të kësaj rruge, ndërtimi i së cilës u bë nga fondet e BE-së dhe deklaruan se projekte të këtyre standardeve do të ketë dhe në vijim, jo vetëm në Tiranë, por edhe në Shqipëri. “Unë ju siguroj se ky është vetëm fillimi i një bashkëpunimi me ju. Rreth 100 metra nga këtu po finalizohen punimet në sheshin ‘Skënderbej’, pas disa ditësh do të hapim projektin për zgjerimin e arteries nga Stacioni i Trenit deri në Paskuqan”, u shpreh kryetari i Bashkisë së Tiranës, Lulzim Basha. Ambasadori i BE-së, Etore Sekui, në fjalën e tij theksoi se më mirë se kjo rrugë askush nuk mund të justifikonte investimet e BE-së në Shqipëri. “Jemi të inkurajuar nga puna që është bërë për këtë rrugë, që janë dashur vetëm 18 muaj. Kjo që shikojmë këtu është provë e kombinimit të mirë të përpjekjeve”, tha Sekui.

© Panorama.al