BULQIZË- Nuk ka paqe për minatorët e Bulqizës. Vetëm pak kohë pasi u duk gjithcka në rregull, palët ranë dakord dhe u nënshkrua një marrëveshje për kerkesat, sot 72 minatorë kërcënojnë sërish me grevë. Shkak, sipas tyre është bërë moskorrektesa e administratës së firmës, pasi ata deklarojnë se nuk kanë marrë ende pagën e 13-të.
Minatorët pretendojnë se nuk kanë marrë pagën e 13-të si dhe 22 ditë leje dhe kjo situatë është krijuar pas një përplasje mes firmës koncesionare ACR dhe asaj nënkontraktore.
Minatorët kanë deklaruar se asnjëra palë nuk paguan rrogën e 13 dhe 22 ditë leje, duke hedhur përgjegjësitë njëra tjetrës ndërsa janë shprehur se do të vijojnë protestat në zonën D të galerisë së Bulqizës deri në marrjen e rrogave.
Nënkontraktori shpjegojnë më tej minatorët, thotë se pagat do t’i marrin nga firma ACR. Të gjendur në këto kushte minatorët kanë paraljamëruar përshkallëzim të situatës.
Minatorët e Bulqizës u rikthyen në punë pas 3 muajve ndërprerje të saj, pas arritjes së marrëveshjes me kompaninë konçesionare ACR, e cila plotësoi shumicën e kërkesave të minatorëve, përfshirë rritjen e pagës, rritjen e sigurisë në punë etj.
© Panorama.al
