Naveed Akram, autori i të shtënave me armë zjarri në Bondi Beach në Sydney, është akuzuar për 59 vepra penale, përfshirë 15 për vrasje dhe 1 për kryerjen e një akti terrorist, sipas Policisë së Uellsit të Ri Jugor.
Autori i dytë i dyshuar, babai i tij Sajid Akram, 50 vjeç, u vra në një shkëmbim zjarri me policinë në vendngjarje.
15 persona u qëlluan për vdekje dhe dhjetëra të tjerë u plagosën gjatë sulmit, i cili kishte në shënjestër komunitetin hebraik të Australisë në një aktivitet për të festuar natën e parë të Hanukkah.
Ishte të shtënat më vdekjeprurëse në vend që nga viti 1996. Ndërkohë 24-vjeçari mbeti i plagosur rëndë gjatë incidentit të së dielës dhe pati seancën e tij të parë dëgjimore nga shtrati i spitalit.
Policia e ka cilësuar sulmin si incident terrorist, me kryeministrin australian Anthony Albanese i cili tha se është “motivuar nga ideologjia e grupit Shteti Islamik”.
Policia tha se flamuj të grupit Shteti Islamik dhe pajisje shpërthyese të improvizuara (IED) janë gjetur në automjetin e përdorur nga personat e armatosur.
Baba e bir kishin udhëtuar për në Filipine një muaj para sulmit në plazhin Bondi. Ata qëndruan atje nga 1 nëntori deri më 28 nëntor. Destinacioni i tyre përfundimtar ishte qyteti jugor i Davaos, tha një zëdhënës i imigracionit.
Naveed Akram udhëtoi për në Filipine duke përdorur një pasaportë australiane, ndërsa babai i tij Sajid përdori një pasaportë indiane.
