Ministria holandeze e Mbrojtjes paralajmëroi të martën se Rusia mund të nisë një fushatë ushtarake “në shkallë të kufizuar” kundër një vendi të NATO-s vetëm një vit pas përfundimit të luftës në Ukrainë.
Në raportin e saj vjetor mbi strategjinë e mbrojtjes së vendit, ministrja Dylan Yesilgoz tha se Evropa ishte në një “zonë gri” midis luftës dhe paqes dhe u zotua të rrisë investimet në sektorin holandez të mbrojtjes, veçanërisht në sistemet e armëve pa pilot, siç janë dronët.
“Shërbimet holandeze të inteligjencës vlerësojnë se Rusia po përgatit një konfrontim të gjatë me Evropën. Në rastin më të keq, mund të ketë një luftë të kufizuar kundër anëtarëve të NATO-s, pas përfundimit të luftës së Rusisë në Ukrainë”, u shprehën zyrtarët holandezë.
Paralajmërimi vjen një javë para samitit të NATO-s që do të mbahet në Ankara më 7-8 korrik. Kërcënimi rus pritet të jetë në qendër të diskutimeve.
Sekretari i Përgjithshëm i NATO-s, Mark Rutte, ka thënë se Rusia “mund të jetë gati brenda pesë viteve të ardhshme” për një konflikt me Aleancën.
Për t’iu përgjigjur kërcënimeve, Holanda planifikon të krijojë një “laborator zhvillimi” të posaçëm për mjetet ajrore pa pilot të afta për të luftuar mjete të tjera ajrore pa pilot.
“Pyetja është nëse Evropa dhe Holanda do të jenë mjaftueshëm të forta në kohë për të mbrojtur lirinë, sigurinë dhe mënyrën tonë të jetesës”, tha Ministri i Mbrojtjes Dylan Yesilgoz. “Kjo është përgjegjësi e çdo brezi, por rrallë ka qenë kaq urgjente”, shtoi ajo.
© Panorama.al
