Ish-kryeministri norvegjez Thorbjørn Jagland është akuzuar për “korrupsion të rëndë” për lidhjet e tij me abuzuesin seksual amerikan Jeffrey Epstein, tha policia.
Akuza u ngrit pasi Këshilli i Evropës i hoqi imunitetin Jaglandit, të cilin ai e gëzonte për shkak të rolit të tij diplomatik në të kaluarën.
Prokuroria norvegjeze ka kontrolluar tre prona të Jagland dhe pritet ta marrë atë në pyetje. Avokati i tij ka deklaruar se Jagland mohon çdo përgjegjësi penale dhe është i gatshëm të bashkëpunojë për hetimin.
Sipas mediave norvegjeze, email-e të publikuara nga Departamenti Amerikan i Drejtësisë tregojnë se Jagland kishte planifikuar vizita, përfshirë udhëtime familjare, në pronat e Epstein në Paris, Nju Jork dhe Palm Beach, edhe pasi ky i fundit ishte dënuar për vepra seksuale.
Dokumentet sugjerojnë gjithashtu se Epstein mund të ketë mbuluar shpenzime udhëtimi për Jaglandin dhe familjen e tij. Një udhëtim i planifikuar në ishullin privat të Epstein në Karaibe në vitin 2014 thuhet se u anulua.
Jagland përballet edhe me pretendime se ka kërkuar ndihmën e Epstein për të siguruar një kredi bankare, megjithëse policia nuk ka konfirmuar nëse kjo çështje përfshihet në akuzën për korrupsion.
Çështja është pjesë e një skandali më të gjerë që ka përfshirë figura të njohura norvegjeze, pas publikimit të dosjeve të reja mbi Epstein. Mes emrave të përmendur janë Princesha e Kurorës Mette-Marit, diplomatët Mona Juul dhe Terje Rød-Larsen, si dhe drejtori i Forumit Ekonomik Botëror, Børge Brende. Disa prej tyre janë nën hetim, ndërsa të tjerë kanë kërkuar falje publike ose kanë mohuar akuzat.
