Prokuroria e Beratit ka kërkuar masa sigurimi për 11 persona të dyshuar për ushtrimin pa licencë të veprimtarisë financiare, konkretisht të këmbimit valutor.
Sipas hetimeve 6-mujore, të zhvilluara në disa bashki të qarkut Berat, personat nën hetim dyshohet se ushtronin aktivitet këmbimi valutor pa autorizim nga Banka e Shqipërisë, përmes gjashtë subjekteve tregtare.
Gjatë hetimeve, Prokuroria ka kryer 28 veprime të kontrolluara, përmes të cilave, sipas saj, është dokumentuar veprimtaria e paligjshme.
Në kuadër të kontrolleve janë sekuestruar rreth 88 milionë lekë, 118 mijë euro, 7.390 dollarë dhe 665 paund.
Njoftimi:
Ushtronin aktivitet bankar pa licencë, Prokuroria e Beratit kërkon masa sigurimi ‘Arrest në shtëpi’ dhe ‘Detyrim paraqitje’ për 11 persona
Prokuroria pranë Gjykatës së Shkallës së Parë të Juridiksionit të Përgjithshëm, Berat kërkoi masa sigurimi ‘Arrest në shtëpi’ dhe ‘Detyrim për t’u paraqitur në policinë gjyqësore’, për 11 persona, nën hetim për veprën penale ‘Ushtrimi pa licencë i veprimtarive financiare’.
Nga hetimet e kryera në kaudër të procedimit penal nr.47, rezultoi se në gjashtë subjektet tregtare të hetuara, nga administratorët dhe punonjësit e tyre, është ushtruar aktivitet këmbimi valutor pa lejen e organeve kompetente.
Hetimet proaktive gjashtë mujore të Prokurorisë pranë Gjykatës së Shkallës së Parë të Juridiksionit të përgjithshëm Berat u shtrinë në pesë bashki në të gjithë qarkun dhe arritën të provojnë aktivitetin e paligjshëm të shtetasve S.T., H.S., M.M., S.H., S.C., A.H., A.S., O.V. Z.M., E.T. dhe K.P.
Këta shtetas kishin biznese të regjistruara me fushë veprimtarie “Agjent për kryerjen e veprimtarisë financiare për transfertat e parave në emër dhe për llogari të një subjekti financiar, jo bankë. Më konkretisht, shërbimet Unionnet dhe Ëestern Union, me vendodhje në Berat e Kuçovë rezultuan se nuk ishin në listën e zyrave të këmbimit valutor të licencuara duke funksionuar pa licencë të lëshuar nga Banka e Shqipërië.
Në bazë të autorizimit të dhënë nga ana e organit të akuzës për lejimin e kryerjes së veprimeve stimuluese dhe kryerjen e regjistrimit të fshehtë fotografik, filmik ose me video, u kryen 28 veprime këmbimi të vlerave monetare në subjektet e dyshuara, duke vërtetuar se ushtrojnë këtë veprimtari pa licencë.
Për sa më sipër Prokuroria pranë Gjykatës së Shkallës së Parë të Juridiksionit të Përgjithshëm, Berat kërkoi masat e sigurimit “Detyrimi për t’u paraqitur në policinë gjyqësore” dhe “Arrest në shtëpi”, parashikuar nga nenet 233, 234 dhe 237 të Kodit tё Procedurёs Penale.
Nga kontrollet e ushtruara në funksion të këtij procedimi, u gjetën dhe sekuestruan:
88 milionë lekë; 118 mijë euro; 7390 dollarë; dhe 665 paund.
© Panorama.al
