Deputetja laburiste dhe ish-ministrja britanike Tulip Siddiq është dënuar me dy vite burg në Bangladesh, pasi u gjykua në mungesë së bashku me 16 persona të tjerë për akuza korrupsioni, raporton BBC.
Sipas vendimit të gjykatës, ajo u shpall fajtore për ushtrim ndikimi ndaj tezes së saj, ish-kryeministres së rrëzuar të Bangladeshit, Sheikh Hasina, me qëllim sigurimin e një toke për familjen e saj në periferi të Dhakës. Siddiq i ka mohuar me forcë këto pretendime.
Deputetja, e cila jeton në Londër dhe ka refuzuar akuzat, pritet të mos e vuajë dënimin. Ajo aktualisht përfaqëson zonën zgjedhore Hampstead & Highgate në Parlamentin britanik dhe ndaj saj vazhdojnë të jenë të hapura disa çështje të tjera ligjore në Bangladesh.
Që prej rrëzimit të qeverisë së Hasinës, prokurorët bangladeshas kanë hapur një sërë çështjesh gjyqësore ndaj ish-kryeministres, bashkëpunëtorëve të saj dhe anëtarëve të familjes.
Procesi gjyqësor ndaj Siddiq, e cila u largua nga posti i ministres së Thesarit në janar, mes polemikave lidhur me lidhjet familjare me Hasinën, ka vijuar në Dhaka që prej muajit gusht.
Në dokumentet e gjykatës thuhet se Siddiq “ka ushtruar ndikim ndaj tezes së saj, ish-kryeministres Sheikh Hasina, duke përdorur pozitën e saj për të siguruar një tokë për nënën Rehana Siddiq, motrën Azmina Siddiq dhe vëllanë Radëan Siddiq”.
© Panorama.al
