Një përplasje e pazakontë ka shpërthyer brenda Asamblesë së Ekspertëve të Iranit, organit përgjegjës për emërimin dhe mbikëqyrjen e Liderit Suprem, duke nxjerrë në pah përçarjet e thella në elitën politike dhe fetare të vendit lidhur me negociatat me Shtetet e Bashkuara dhe programin bërthamor.
Sipas medias opozitare Iran International, më shumë se 60 nga 84 anëtarët e Asamblesë nënshkruan një deklaratë të përbashkët në të cilën shprehën mbështetje për ekipin negociator iranian, por paralajmëruan se nuk duhet të shkelen “vijat e kuqe” të përcaktuara nga Lideri Suprem.
Në deklaratë thuhet se respektimi i këtyre vijave përbën “detyrim fetar”, ndërsa theksohet se të drejtat bërthamore të Iranit nuk duhet të jenë objekt negociatash. Dokumenti trajton gjithashtu çështje që lidhen me Ngushticën e Hormuzit, Libanin, si dhe marrëdhëniet me SHBA-në dhe Izraelin.
Pika më kontroverse e deklaratës ishte pretendimi se presidenti amerikan Donald Trump dhe kryeministri izraelit Benjamin Netanyahu mbajnë përgjegjësi për kërcënimet ndaj Liderit Suprem, duke përfshirë edhe një formulim që është interpretuar si thirrje për vrasjen e tyre.
Reagim i menjëhershëm nga drejtuesit e Asamblesë
Vetëm disa orë pas publikimit të deklaratës, presidiumi dhe sekretariati i Asamblesë së Ekspertëve reaguan publikisht, duke u distancuar nga iniciativa e grupit të anëtarëve.
Në deklaratën zyrtare u theksua se asnjë grup deputetësh nuk mund të flasë në emër të institucionit pa ndjekur procedurat e parashikuara. Sipas drejtuesve të Asamblesë, vetëm seanca plenare, kryetari, presidiumi ose sekretariati kanë të drejtën të publikojnë qëndrime zyrtare.
Megjithatë, udhëheqja ritheksoi mbështetjen për Liderin Suprem dhe nevojën që negociatat me Shtetet e Bashkuara të zhvillohen në përputhje me udhëzimet e tij.
Reagime nga qarqet ultrakonservatore
Qëndrimi i presidiumit shkaktoi reagime të ashpra nga qarqet ultrakonservatore. Portali iranian Raja News, i njohur për kundërshtimin e negociatave me Uashingtonin, akuzoi drejtuesit e Asamblesë se po dëmtojnë unitetin e institucionit.
Media ngriti pikëpyetje se përse një shumicë kaq e madhe e anëtarëve ndjeu nevojën të anashkalonte drejtuesit e organit dhe la të kuptohet se mosmarrëveshjet lidhen edhe me mënyrën se si po menaxhohen çështjet më të rëndësishme të shtetit.
Presidenti Pezeshkian viziton Qomin
Në të njëjtën kohë, presidenti iranian Masoud Pezeshkian zhvilloi një vizitë në qytetin e shenjtë të Qomit, qendra më e rëndësishme fetare e Iranit.
Sipas raportimeve, vizita shihet si një përpjekje për të siguruar mbështetjen e autoriteteve më të larta fetare në një periudhë tensionesh të forta politike dhe debatesh mbi negociatat me SHBA-në.
Sipas Iran International, kjo përplasje publike brenda një institucioni që tradicionalisht vepron larg vëmendjes së publikut tregon se mosmarrëveshjet mbi marrëdhëniet me Shtetet e Bashkuara dhe drejtimin e politikës së jashtme janë intensifikuar në nivelet më të larta të udhëheqjes iraniane.
© Panorama.al
