Gjykata Speciale në Hagë ka dënuar me tri vjet burgim Haxhi Shalën, dhe me nga dy vjet burgim, Sabit Januzin dhe Ismet Bahtjarin.
Trupi gjykues ka vendosur që të miratojë marrëveshjen për pranimin e fajësisë për tre të akuzuarit, ish ushtare te UÇK, lidhur me akuzat që kanë të bëjnë me pengim të drejtësisë.
Në marrëveshjen mes prokurorisë dhe të akuzuarve për zhdëmtimin e viktimave, palët kanë rënë dakord që Haxhi Shala t’i paguajë 400 euro, Januzi 100, ndërsa Bahtjari asnjë cent.
Edhe marrëveshja për zhdëmtimin e viktimave është pranuar nga Gjykata, ku u është dhënë kohë deri të mërkurën.
Secili prej të akuzuarve pranoi se ishte pjesë e një grupi që tentoi të nxiste një person që të mos jepte dëshmi para Dhomave të Specializuara përmes premtimit të një përfitimi.
Konkretisht, Sabit Januzi dhe Ismet Bahtijari – me udhëzim të Haxhi Shalës – kontaktuan personin në shtëpinë e tij, përkatësisht më 5 dhe 12 prill 2023.
“Në bazë të marrëveshjeve për pranimin e fajësisë, Trupi Gjykues shqiptoi gjithashtu dënime kundër z. Shala, z. Januzi dhe z. Bahtijari si vijon: • Haxhi Shala u dënua me 3 vjet burgim. • Sabit Januzi u dënua me 2 vjet burgim. • Ismet Bahtijari u dënua me 2 vjet burgim. Trupi Gjykues zbriti nga dënimet e dhëna kohën e kaluar në paraburgim që prej arrestimit të të akuzuarve”, thuhet në njoftim.
Bahtijari dhe Januzi u arrestuan në tetor 2023, ndërsa Shala në dhjetor 2023. Koha e kaluar në paraburgim në Gjykatën Speciale në Hagë prej atëherë, do t’iu llogaritet në vuajtjen e dënimit.
© Panorama.al
