Ashtu sikurse herët e tjera, qytetarët kanë përcjellë mesazhe të forta përmes pankarteve në ditën e 28-të të protestës.
Përmes tyre, qytetarët i bëjnë thirrje SPAK që të nisë hetimet ndaj kryeministrit Edi Rama, për të cilin kërkojnë prej 3 javësh dorëheqjen.
“Drejtësi për popullin, SPAK heto Ramën”, thuhet në një pankartë.
Në një tjetër, qytetarët e kanë ironizuar kryeministrin edhe për letrën e një arkitekti drejtuar tij të përfshirë në librin “Albanian Files”, në të cilën flitej për zgjatjen e pakufizuar të mandatit, duke shkuar deri te koncepti i “presidentit të përjetshëm” apo edhe “mbretit”.
“Bëhu mbret”, “Kur të thonë bëhu mbret, është koha të ikësh”, ishin disa nga pankartat.
