Media ndërkombëtare vazhdon t’i bëjë jehonë protestave popullore në Tiranë kundër qeverisë, por edhe reagimeve të figurave publike.
Mes tyre, vëmendje i është kushtuar edhe deklaratave të këngëtares shqiptare me famë botërore, Dua Lipa. “The Times” i kushton një vend të veçantë në raportimin e fundit.
“Dua Lipa mbështet protestat e shqiptarëve kundër resortit të Ivanka Trump. Ylli i popit, prindërit e të cilit janë shqiptarë të Kosovës, i quajti demonstratat “frymëzuese” dhe shprehu shqetësim për vilat luksoze që po ndërtohen në tokë të mbrojtur”, kështu e ka nisur artikullin media e njohur “The Times”.
Në podkastin e Klubit të Librit Service95 , në një bisedë me shkrimtaren shqiptare Lea Ypi, Dua Lipa shprehu mbështetjen e saj për protestat kundër projektit për një vendpushim luksoz të lidhur me Ivanka Trump dhe bashkëshortin e saj Jared Kushner në Shqipëri.
Këngëtarja tha se ndan shqetësimet e protestuesve në lidhje me transparencën e projektit dhe e quajti mobilizimin popullor “frymëzues”.
“Ajo që e gjej vërtet shqetësuese është parimi se qeveria thjesht mund të ndryshojë ligjin për të hequr mbrojtjet mjedisore pa asnjë konsultim publik”, tha ajo.
© Panorama.al
