TIRANË- Kreu i qeverisë, Sali Berisha, duke falenderuar kryetarin e Asamblesë Kombëtare të Kuvajtit, Jassim Mohammad Al-Kharaf për mbështetjen e dhënë për infrastrukturën ka garantuar se po punohet ngushtësisht me bashkinë e Tiranës për t’i kthyer qytetarëve sheshin “Skenderbej”, në formën më dinjitoze që ata meritojnë.
Gjatë takimit mes tyre, në kryeministri, Berisha e vlerësoi këtë vizitë si një kontribut të ri e të rëndësishëm në zhvillimin e mëtejshëm dhe konsolidimin e marrëdhënieve shumë miqësore dhe bashkëpunimit midis të dy vendeve dhe popujve.
Ai shprehu mirënjohjen e tij dhe të qeverisë së tij ndaj mbështetjes së vazhdueshme dhe ndihmës gjeneroze , që madhëria e tij Emiri i Kuvajtit dhe qeveria e Kuvajtit përmes fondit kuvajtian i kanë akorduar Shqipërisë gjatë gjithë këtyre viteve, për realizmin e projekteve të rëndësishme. Një ndër këta projekte, për të cilin është punuar intensivisht është rikonstruksioni i sheshit Skënderbej.
“Qeveria shqiptare po bashkëpunon ngushtësisht me bashkinë e Tiranës, për të realizuar sa më shpejt këtë projekte të rëndësishëm, për t’u rikthyer qytetarëve nyjen nevralgjike të qendrës se Tiranën në formën më dinjitoze që ata meritojnë”- tha Berisha.
Al-Kharaf vlerësoi arritjet e rëndësishme të qeverisë shqiptare gjatë kësaj periudhe dhe vlerësoi marrëdhëniet shumë të mira dhe miqësore midis të dy vendeve.
© Panorama.al
