Andy Burnham pritet të marrë detyrën si udhëheqës i Partisë Laburiste në pushtet, duke i hapur rrugën për t’u bërë kryeministër të hënën kur Keir Starmer t’i paraqesë dorëheqjen Mbretit Charles.
Ish-kryetari i bashkisë së Mançesterit të Madh është kandidati i vetëm pasi ka siguruar mbështetjen e shumicës dërrmuese të deputetëve laburistë. Zgjedhja e tij pritet të ratifikohet në një konferencë të posaçme të partisë në Londër, sipas statutit të partisë.
Në fjalimin e tij të parë si udhëheqësi i ri i Partisë Laburiste, Burnham pritet të paraqesë kredencialet e tij politike, duke theksuar rritjen ekonomike, decentralizimin, shërbimet publike dhe reformën e kujdesit social.
Ai gjithashtu do të zotohet të udhëheqë një qeveri “qartësisht laburiste” që do të ketë, siç pritet të thotë ai, “kurajën për të zgjidhur problemet e mëdha që politika i ka lënë të pazgjidhura”.
Ndryshimi në udhëheqje do të ndodhë pa zgjedhje kombëtare, pasi sistemi parlamentar britanik i lejon partisë në pushtet të zëvendësojë udhëheqësin e saj dhe, si rrjedhojë, kryeministrin, për sa kohë që ajo ende ka shumicën në Dhomën e Komunave.
Të hënën në mëngjes, Keir Starmer do të shkojë në Pallatin Buckingham për t’i paraqitur dorëheqjen e tij Mbretit Charles III. Menjëherë pas kësaj, monarku do t’i ngarkojë Andy Burnham formimin e një qeverie të re dhe udhëheqësi i ri i Partisë Laburiste do të marrë zyrtarisht detyrën si Kryeministër i Mbretërisë së Bashkuar.
© Panorama.al
