Pas daljes së Rusisë nga traktatet bërthamore, një zyrtar ruz ka paralajmëruar për një garë armësh “të pakontrollueshme” që përfshin fuqi të shumta bërthamore.
“Në thelb, ne jemi dëshmitarë të një gare armatimesh raketore me pasoja që janë të vështira për t’u parashikuar,” u citua të thoshte Grigory Mashkov, nga media shtetërore.
“Dhjetëra miliarda dollarë po investohen në përmirësimin e teknologjisë raketore”, shtoi ai.
“Ky proces po merr një karakter të pakontrollueshëm”, tha ai më tej.
Sipas mediave të huaja, për të bërë sa më të besueshme deklaratat e tij, Mashkov iu referua një reviste që fliste për zgjerimin e shpejtë të sistemeve raketore të Kinës dhe zgjerimin e aftësive bërthamore të Izraelit, Indisë dhe Pakistanit.
Shkencëtarët bërthamorë thanë në janar se “Ora e Ditës së Kijametit”, një njësi matëse e rrezikut të zhdukjes së njerëzimit, ishte më afër mesnatës se kurrë më parë, si rezultat i rritjes së tensioneve bërthamore që nga pushtimi rus i Ukrainës.
Në shkurt, Putin njoftoi se Moska po pezullonte traktatin e ri START me Shtetet e Bashkuara, i cili kufizon kokat bërthamore të vendosura në gatishmëri të secilës palë, duke u justifikuar se Uashingtoni po përpiqej t’i shkaktonte një “disfatë strategjike” Rusisë në Ukrainë.
NDIQE LIVE "PANORAMA TV" © Panorama.al
