Ish-kryeministri i Italisë, Silvio Berlusconi është ndarë nga partnerja e tij pas 12 vitesh lidhje.
Miliarderi 83-vjeçar dhe Francesca Pascale raportohet se do mbeten miq me njëri-tjetrin, tha Forza Italia në një deklaratë.
Pascale, e cila para disa kohësh tha në një intervistë se i kërkonte Berluskonit çdo ditë të martohej me të, sipas gazetës Repubblica, është befasuar nga deklarata.
“I uroj gjithë lumturinë e botës dhe shpresoj të gjejë dikë që do kujdeset për të ashtu si unë,” tha 34-vjeçarja.
Raportohet se Berlusconi është në një lidhje me deputeten e partisë së tij, 30-vjeçaren Marta Fascina.
Ish kryeministri i divorcuar 2 herë, ka dominuar politikën italiane për më shumë se dy dekada pavarësisht skandaleve seksuale dhe problemeve ligjore me të cilat u përball.
Ndërkohë prej disa ditësh në media qarkullonin thashethemet për një lidhje të tij me Fascina. Ata u fotografuan nga paparacët duke u larguar nga një hotel në Zvicër, së bashku me qenin e Pascale.
Mediat italiane raportuan në vitin 2014 se Pascale bleu një fustan nusërie për të festuar divorcin e Berluskonit nga gruaja e tij e dytë, Veronica Lario.
Në atë kohë, Lario, e cila ka tre fëmijë me Berlusconin, u shpreh se nuk mund të duronte më shoqërimin e ish bashkëshortit të saj me të mitura.
Ajo vuri në dyshim gjendjen e tij mendore pasi i dha fund martesës 19 vjeçare.
NDIQE LIVE "PANORAMA TV" © Panoramaplus.al