Ministri i Emigracionit në Britaninë e Madhe, Robert Jenrick bëri sot një deklaratë në Dhomën e Komunave mbi planin e qeverisë për të trajtuar emigracionin e paligjshëm, i cili përfshin njerëzit që mbërrijnë në Mbretërinë e Bashkuar përmes rrugëve të parregullta për të kërkuar azil, ku mes tyre ka edhe shumë shqiptarë.
Jenrick tha se që nga marrëveshja që Anglia arriti me Shqipërinë në dhjetorin e vitit të kaluar, janë kthyer mbrapsht 3.500 emigrantë shqiptarë.
Për pasojë, sipas tij, ka një rënie të ndjeshme me 90% të shqiptarëve që arrijnë në Britaninë e madhe në mënyrë ilegale, raportojnë mediat britanike.
Ai tha se avokatë që do të zbulohen duke mësuar emigrantët se si të qëndrojnë në vend me histori të rreme do të përballen me një dënim deri në burgim të përjetshëm.
“Muajin e kaluar ne shpallëm Task Forcën Profesionale, e cila do të rrisë masat përmbarimore kundër atyre avokatëve dhe përfaqësuesve ligjorë, të cilët ndihmojnë emigrantët të abuzojnë me sistemin e emigracionit. Ata avokatë që do të zbulohen duke mësuar emigrantët se si të qëndrojnë në vend me histori të rreme do të përballen me një dënim deri në burgim të përjetshëm. Që nga marrëveshja jonë me Shqipërinë në dhjetor të vitit të kaluar, ne kemi kthyer mbi 3500 emigrantë në javë. Ne kemi parë një ulje prej më shumë se 90% të numrit të shqiptarëve që vijnë ilegalisht. Deri më tani këtë vit ka pasur mbi 12,600 kthime, me kthime në gjysmën e parë të këtij viti 75% më të larta se e njëjta periudhë e vitit të kaluar”, tha Jenrick.
Jenrick gjithashtu tha se këto ndryshime ndjekin Aktin historik të Migrimit të Paligjshëm, i cili, së bashku me Partneritetin e tyre Ruandën, do të sjellë ndryshime vendimtare për të hequr të gjitha stimujt që njerëzit të bëjnë kalime të paligjshme nga Franca.
“Natyrisht, këto ndryshime ndjekin Aktin historik të Migrimit të Paligjshëm, i cili, së bashku me Partneritetin tonë me Ruandën, do të sjellë ndryshimet vërtet vendimtare të nevojshme për të hequr të gjitha stimujt që njerëzit të bëjnë kalime të paligjshme nga siguria e Francës”, tha Jenrick.
NDIQE LIVE "PANORAMA TV" © Panorama.al
