Aktorja e njohur Rudina Dembacaj ka folur së fundmi rreth pretendimeve të ish-bashkëshortit të saj se nuk takohet me vajzën e tij, duke u shprehur se gjithçka është një “show” dhe se do që të përfitojë nga fama e saj.
Sipas pretendimeve të ngritura, Aleksandri nuk e takon vajzën e tij shpesh dhe shkak për këtë është Rudina, e cila mesa duket nuk dëshiron që Viktoria të takojë të atin. Disa muaj më parë, Aleksandri pretendoi se kishte një vit pa e takuar vajzën e tij, ndërsa Rudina në atë kohë u betua se nuk e ka ndaluar kurrë vajzën të takohet me babain e saj.
Në korrikun e këtij viti, Aleksandri bëri një postim në profilin e tij të “Instagram”- it, duke treguar se pas shumë kohësh, më në fund kishte pasur mundësinë të takonte vajzën e tij.
Në një intervistë të dhënë së fundmi, e pyetur në lidhje me pretendimet e bashkëshortit të saj, Rudina është shprehur: “Unë nuk kam absolutisht aspak problem tashmë kur njerëzit kërkojnë vëmendje dhe famë, t’i injoroj. Patjetër që e drejta është shumë e thjeshtë për t’u gjendur dhe do e gjejmë të drejtën se kush mendon që i ka rënë në qaf njëri-tjetrit apo çdo njeri që shënjestron dikë.
Është e rëndësishme që të ketë tentuar ta zgjidhë njëherë përtej portaleve. Nëse unë dal sot dhe bëj ‘show’. E di çfarë më kujton kjo situatë, ishte një blogere e huaj në rrjetet sociale që jepte këshilla për fëmijët dhe ndërkohë fëmijët e vet i abuzonte, i linte pa ngrënë etj. Pra, me pak fjalë çfarë shfaqim ne dhe çfarë bëjmë në realitet është shumë relative”.
Aktorja e njohur është pyetur gjithashtu nëse ndihet keq për këtë situatë të krijuar, kur njerëzit duan të përfitojnë nga fama e saj.
“Të them të drejtën, unë dua të shoh anët pozitive. Mua më vjen jashtëzakonisht mirë që kam një fëmijë të shëndetshëm, të lumtur, që kalojmë shumë kohë bashkë. Patjetër që ka shumë problematika në rritjen e një fëmije, por sot unë ia kam dalë që me ndihmën e shumë profesionistëve, Viktoria të jetë një fëmijë i qetë dhe nuk dua që në rrjetet apo në tituj të qarkullojnë lajme se si Viktoria e ka kaluar këtë”, shton aktorja.
Ndërkohë vetëm pak kohë më parë, Rudina foli edhe për marrëdhënien që ka me fëmijët e bashkëshortit të saj, Mark Frroku. Duke u shprehur se ka një familje të madhe e të lumtur, ajo zbuloi më shumë detaje.
“Në fakt, mua më thërrasin ‘crazy mama’ se thellëthellë jam pak e çmendur. Më pëlqen të dal gjatë gjithë kohës nga rutina dhe të ndryshoj atmosferën në shtëpi. S’dua të jemi çdo të diel njësoj. Nëse do ruajmë të njëjtën traditë dhe për të dielat, do të bëheshim shumë të mërzitshëm”, tregoi ajo.
Nëpërmjet një postimi në rrjetin social “Instagram”, Aleksandri ka treguar se vajza e tij jeton me të ëmën dhe familjen e saj të re dhe se që prej një viti nuk e ka takuar atë. Kjo nuk është hera e parë që ai poston foto me vajzën e tij, kujtime të vjetra.
“Një vit pa të puthur. Do të rritesh e do të sqaroj gjëra që nuk ia uroj askujt. Më ka marrë malli”, ka shkruar ish-bashkëshorti i Rudinës në “Instagram” krahas një fotoje me të bijën.
Për këtë, Rudina ka bërë një reagim publik, ku shprehet: “Unë di të të them që nga ana ime, nuk është penguar dhe nuk do të pengohet kurrë që fëmija im të takojë prindin e vet. Nuk do ta bëj këtë kurrë dhe për këtë të betohem për kokën e saj”, thotë Rudina në një video në “Instagram”, pasi një ndjekës i bën pyetjen nëse është e vërtetë që vajza nuk takon të atin.
