Një zyrtar i Bashkimit Evropian konfirmoi sot se Kina kishte trajnuar me të vërtetë qindra ushtarë rusë, veçanërisht në përdorimin e dronëve, përpara se disa prej tyre të luftonin në Ukrainë.
“Trajnimi i ushtarëve rusë nga kinezët është konfirmuar nga shërbimet tona”, tha ai në kushte anonimiteti, duke konfirmuar raportet e shtypit.
Në trajnim, i cili u zhvillua në pjesë të ndryshme të Kinës, morën pjesë qindra ushtarë rusë, disa prej të cilëve u dërguan më vonë në Ukrainë.
Sipas gazetës gjermane Die Welt, e cila nuk i përmend shërbimet e inteligjencës evropiane që fshihen pas këtyre zbulimeve, disa qindra ushtarë rusë morën pjesë në programet e trajnimit të Ushtrisë Çlirimtare Popullore në gjashtë objekte të ndryshme ushtarake në Kinë në fund të vitit 2025.
“Këto kishin të bënin me ‘përdorimin e sistemeve pa pilot, kundërmasat elektronike kundër dronëve, si dhe simulimet moderne të luftimit’”, vazhdon gazeta.
Pjesëmarrësit ishin të rangjeve dhe brezave të ndryshëm. Disa ishin anëtarë të Rubicon, një njësi elitare ruse e specializuar në dronë.
Pas përfundimit të stërvitjes, dhjetëra prej tyre morën pjesë në luftime në Ukrainë në fillim të vitit 2026, disa prej tyre në pozicione administrative, sipas gazetës Die Welt.
© Panorama.al
