Zgjedhjet e 8 majit, si u prish gara e të fortëve nga të tretët

Në fillim të garës elektorale, në qendër të vëmendjes ishin dy partitë kryesore, ajo Demokratike dhe Socialiste. Në zonat ku kandidatët kanë hyrë në garë nën siglën e koalicioneve, si “Aleanca për qytetarin”, ashtu dhe “Aleanca për të ardhmen” votat kanë qenë të sigurta. Por, çfarë ka ndodhur kur në mes kanë hyrë kandidatët e futur në garë me mbështetjen e vetme të partisë së tyre? Faktet që vijnë nga Tepelena, Puka apo dhe bashkia e Sukthit, tregojnë luhatjen e dy forcave kryesore kur në garë është dhe një e tretë, e “neglizhuar”. Në Bashkinë e Tepelenës u shpall dje fitorja e kandidatit të Partisë Socialiste, nën koalicionin e Aleancës për të Ardhmen, Tërmet Peçi. Ai arriti të merrte bastionin që drejtohej prej demokratit Sevo Mici, i cili arriti të merrte vetëm 750 vota në krahasim me 1700 votat e fituesit, duke u renditur në vend të tretë. Në vend të dytë arriti kandidati i LZHK-së, Reshat Zika, me 1130 vota. Një rast tjetër është ai i bashkisë së Pukës, ku më 8 maj, kandidat potencial ishte dhe ai i Partisë së Çështjes Shqiptare. Ashtu siç pritej, gara është zhvilluar e ngushtë, duke bërë që kandidati i PD-së, Beqir Arifi, të arrijë të fitojë në zonën e PS-së me 955 vota kundrejt 902 votave të Enver Sulejmanit, i zgjedhur nga socialistët, ndërsa Astrit Kuqi, i PÇSh-së, mori 704 vota. E njëjta situatë u krijua në bashkinë e Sukthit. Përballë dy koalicioneve, në garë ishte dhe kandidati i pavarur, Hysen Llaca. Ky i fundit kishte kaluar dy mandate të mëparshme nën siglën e PS-së. Ai siguroi plot 1068 vota në përfundim të votimit, duke i “vjedhur” PS-së mbështetësit, pasi socialisti Selami Xhelili mori 2160 vota, ndërsa fituesi, demokrati Sherif Fortuzi, mori 3788 vota.

© Panorama.al